"Сахагипрозем" ААО Нам улууһугар баар бултуур сирдэри туһаныы уонна көрүү-истии туругун көрдөрөр электроннай каартаны 2012 сыллаахха оҥорбут. Маннык докумуон республика 5 эрэ улууһугар оҥоһуллубут. Онно улуус территориятыгар төһө кыыл-сүөл үөскүүрэ, үөскүөн сөбө ааҕыллыбыт, бултуур сирдэри туһаныыга ылбыт субъектар сирдэрин кыраныыссалара, сыһыарыллыбыт, сыһыарыллыбатах сирдэр ханнык көрүҥүнэн туһанылла сылдьаллара ыйыллыбыт.
Нам улууһугар бултуур сир уопсай иэнэ 1120051,41 кв.м. тэҥнэһэр. Ол иһиттэн уопсай туһаныыга сылдьара 50,96%, сыһыарыллыбыта 30,24%, уһулуччу көрүүгэ-истиигэ сылдьара 10,01%, бултуурга хааччахтардаах сирдэр - 2,97%. Бултуур билиэттээх киһи ахсаана 1750 эбит. Булдунан дьарыктанар 7 юридическэй сирэй уонна ИП бааллар. Олор ортолоругар Арбыҥҥа «ИП Бугаев П.Е.», Таастаахха «ИП Казанов Н.Н.», Үөдэйгэ «ИП Эверстов А.И.», Арбыҥҥа «Дьокуускай» РКО» уонна РОО, Үөдэй, Таастаах сиригэр «Бэрбик» ОПКХ, Түбэ, Маймаҕа сиригэр «Түбэ» ТХПК.
Кэпсэтииттэн иһиттэххэ, булчуттары уонна нэһилиэк дьаһалталарын кыылы-сүөлү бултуурга көҥүллэммэт сир ("зона покоя") Кэҥкэмэ үрэх сүнньүнэн тэриллибитэ уонна кэнники сылларга тайаҕы, эһэни уо.д.а. кыыллары бултуурга квотаны, лицензияны биэрии аччаан иһэрэ долгутар эбит.
Николай Николаевич: "Зона покоя" диэн сиргэ олохтоох нэһилиэнньэ сир астыыра, мас кэрдэрэ, оттуура көҥүллэнэр, бултуур көҥүллэммэт. Оттон квота аҕыйыыра республика салалтатыттан тутулуга суох, Россия нормативын оҥорууга олохтоох усулуобуйа учуоттамматаҕыттан уонна улуус (булчуттартан уонна дьарыктанар тэрилтэлэриттэн) учуоту ыытар карточкалары итэҕэс-быһаҕас, хаачыстыбата суох оҥорон түһэриититтэн уонна толорон ыыппатыттан тахсар. Маны туоратыахха, учуоту ыытар дьоҥҥо көмөлөһүөххэ наада", - диэн эттэ уонна сөбүлэһии түһэрсэн бииргэ үлэлииргэ ыҥырда.
Мунньах боротокуола республикатааҕы булт департаменыгар тиэрдиллиэҕэ диэн буолла. Өрүттэр бултуур сир-уот сыһыарыллыытын, туһаныллыытын бэрээдэктиир сыалтан сөбүлэһии түһэрсэр туһунан биир санааҕа кэллилэр.
Комментарии
Авторизация на сайте через социальные сети