Босния уонна Герцеговина киин куоратыгар айаннаары туран, дойду көҥүл тустууга сүүмэрдэммит хамаандатын сүрүн тренерэ Анзор Темботов суруналыыстарга хамаанданан бастакы миэстэҕэ суоттанабыт диэн эттэ.
- Үгэс быһыытынан, хамаандаҕа дойдуга бастыыр иһин күрэхтэһии кыайыылаахтара киирдилэр. Хонтуруоллуур хапсыһыылары ыытар көдьүүһэ суох этэ. Арай омук сиригэр тахсан тустууктарбытын тургутан көрөр кыахтаахпыт буоллар син да этэ, - диэтэ Анзор Темботов wrestdag.ru. суруналыыһын ыйытыыларыгар хоруйдаан. Кини барыта уолаттартан бэйэлэриттэн, долгуйууларын төһө кыана тутталарыттан, хайдах тустууну көрдөрөллөрүттэн тутулуктааҕын ыйда. «Кинилэр бары бастакы миэстэ иһин киирсэргэ бэлэмнэр», - диэн бэлиэтээтэ кылаабынай тренер.
Россия сүүмэрдэммит хамаандатын састааба: 42 кг — Иван Оконешников, 46 кг — Алексей Копылов, 50 кг — Петр Константинов (бары — Саха сириттэн), 54 кг — Абасгаджи Магомедов, 58 кг — Сослан Гучаков, 63 кг — Хайрулла Нурадинов (бары - Дагестантан), 69 кг — Славик Наниев (ХМАО-Алания), 76 кг — Асланбек Гварамия (Москва уобалаһа), 85 кг — Сослан Лавоев (Алания-Крым), 100 кг — Сослан Хинчагов (Алания).
Атырдьах ыйын 29 күнүгэр, субуотаҕа, 42, 50, 58, 69 уонна 85 киилэлээхтэр күрэстэһиэхтэрэ, оттон сарсыныгар түһүлгэҕэ 46, 54, 63, 76 уонна100 киилэ ыйааһыннаахтар ыҥырыллыахтара.
Комментарии
Авторизация на сайте через социальные сети