ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
25 июня 2015, 17:35

Бүгүн Хаандыгаҕа саҥа таас дьиэ үлэҕэ киллэрилиннэ


Хаандыгаҕа саҥа олорор таас дьиэ иккис уочарата үлэҕэ киллэрилиннэ. Бу дьиэ «2013-2015 сс. гражданнары саахалланар туруктаах дьиэлэртэн көһөрүү» муниципиальнай программанан тутулунна.

photoByWidth&id=37930&width=1000

Саҥа 4 этээстээх комплекска 41 кв. м саҕалаан 87 кв. м диэри араас иэннээх 36 квартира оҥоһулунна, онно 58 киһи көһөн киириэҕэ. Саахалланар туруктаах дьиэлэртэн дьону көһөрүү программаны олоххо киллэриигэ 90 мөл. тахса солк. көрүллүбүтэ. Ол иһигэр ОДьКХ фондатыттан 11,5 мөл. солк., өрөспүүбүлүкэ бюджетыттан 69 мөл. 776 тыһ. солк., 9 мөл. солк. кэриҥэ үп олохтоох бюджеттэн угуллубута.

Бу бырааһынньык күн саҥа дьиэлээхтэр үөрүүлэрин үллэстэ оройуон баһылыга Георгий Герасимов, Хаандыга бөһүөлэгин баһылыга Михаил Алексеев, «Алькор-7» ХЭТ гендириэктэрин солбуйааччы Армен Манукян, ону таһынан үлэ коллективтарын салайааччылара, общественность бэрэстэбиитэллэрэ кэллилэр. Сахалыы үгэһинэн алгысчыт сиэр-туом толордо.

Оройуон баһылыга Георгий Герасимов саҥа дьиэлэммиттэри эҕэрдэлээтэ: «Бүгүн олус үөрүүлээх түгэн буолла. Биһиги маннык дьиэлэри күн аайы туппаппыт. Быйыл саҥа дьиэлэр күлүүстэрин Мэҥэ Алдан, Кириэс Халдьаайы, Тополинай, Дьабарыкы Хайа, Теплай Ключ олохтоохторо тутуохтара. Бу дьиэ Хаандыгаҕа бастакы дьиэнэн буолар, Алдан өрүһү өҥөйөн олорор. Оройуон сайдыытын программатыгар дьону саахалланар дьиэлэртэн көһөрүү инники күөҥҥэ тутуллар. Бу дьиэҕэ оҕо аймах саҥата чугдаара турдун».

photoByWidth&id=37931&width=1000

Хаандыга бөһүөлэгин баһылыга Михаил Алексеев: «Муниципальнай программа 2017 с. диэри үлэлиэҕэ. Дьону саахалланар, хаарбах туруктаах дьиэлэртэн көһөрүү программата уһатыллар түбэлтэтигэр, бөһүөлэк салгыы кыттыаҕа, оччоҕо бу дьиэ утарыта маннык үрдүк дьиэ тутуллуоҕа, арай иэнэ уларыйыан сөп. Саахалланар дьиэни көтүрүү кэнниттэн босхоломмут сиргэ саҥа дьиэлэр тутуллуохтара», - диэтэ. Кини этэринэн, бөһүөлэк дьаһалтата бары күүһүн саахалланар дьиэлэртэн көһөрүүгэ ууруоҕа. 1991 сылтан 2009 сылга диэри оройуон киинигэр тутуу барбатаҕа, онон мас дьиэлэр эргэрбиттэрэ ыраатта. 2015 с. балаҕан ыйын 1 күнүгэр диэри бөһүөлэк дьаһалтата СР Тутууга министерствотыгар саахалланар дьиэлэр реестрдэрин түһэриэхтээх.

Саҥа дьиэлээхтэр ааттарыттан махтал тылларын элбэх оҕолох аҕа Эдуард Севрюк эттэ: «Маннык кэмҥэ тиийиэхпит диэн өр күүппүтүм. Охлопковуул., 14 бараак тииптээх дьиэҕэ олордубут. Кырдьаҕастар кэпсээннэринэн, урут хаайыылаахтар туппуттара үһү. Онно санузеллаах, ваннайдаах, толору хаччыллыылаах гына оҥоһуллубут 3 хостоох квартираҕа олоробут. Дьиэ хаарбах туруктаах, сыллата ититэр ситимэ алдьанар. Биир үчүгэйдээх – бөһүөлэк киинэ уонна оҕуруоттаах. Ол дьиэ иэнэ 65.5 кв. м, онтон бу – 87.7 кв. м. Барыбытыгар миэстэ тиийиэҕэ, биһиги биэс оҕолоохпут, саамай улахаммыт Дьокуускайга студенныыр. Билиҥҥитэ квартирабын көрө иликпин, сэрэбиэйдэһии буола илик. Ыраас, сырдык, уу чумпу – киһини астыннарар. Көрдөххө, тутааччылар кыһаммыт курдуктар. Хайдаҕын аны кыһын билиэхпит. Куукунаҕа электрическай оһох, ваннайга учуотчуктар туруоруллубуттар. Балконнардаах, аныгылыы стеклопакет түннүктэр, тэлгэһэтэ киэҥ. Барыта астык баҕайы! Биһиги бу курдук дьиэни бэйэбит кыахпытынан атыылаһарбыт саарбах. Маннык государственнай программа баарыгар махтал!»

photoByWidth&id=37932&width=1000

Мустубут дьону Армен Манукян эҕэрдэлээтэ уонна символическай күлүүһү бөһүөлэк баһылыгар Михаил Алексеевка туттарда. Лиэнтэни үөрүүлээхтик быһыы кэнниттэн ыалдьыттарга дьиэни көрдөрдүлэр.

Дьоллоох саҥа дьиэлээхтэргэ иллээхтик олороллоругар баҕарабыт! Малааһынынан!

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 819 Источник: ЯСИА Автор: Евдокия Неустроева Изображение: Евдокия Неустроева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ