- Николай Гаврильевич Үөһээ Бүлүүгэ Иккис Үөдүгэй нэһилиэгэр 1931 сыллаахха төрөөбүтэ. Кэлин докумуонугар төрөөбүт күнүн сэтинньи 10 күнэ диэн быһа барыллаан туруорбуттар. Кини Үөһээ Бүлүү сэттэ кылаастаах оскуолатын (билигин Бараахап аатынан оскуола) 1947 сыллаахха бүтэрбитэ. Бу сыл Бүлүүтээҕи педучилищеҕа үөрэнэ киирбитэ. 1951 сыллаахха бүтэрэн алын кылаас учууталын идэтин ылбыта. 1962 сылтан 1965 сылга диэри Өргүөт 8 кылаастаах оскуолатыгар нуучча тылын уонна литературатын учууталынан, завуһунан үлэлээбитэ.1965 сыл күһүнүгэр Хороҕо көһөн киирэр. 1999 с. диэри Хоро орто оскуолатыгар тэрийээччи, завуч, нуучча тылын уонна литературатын учууталынан ситиһиилээхтик үлэлээбитэ. Николай Гаврильевич – уус, уруһуйдьут, техникаҕа сыстаҕас киһи этэ, хаартыскаҕа түһэриинэн утумнаахтык дьарыктаммыта. Ону таһынан, нуучча классиктарын олохторун, айымньыларын хасыһан үөрэппитэ. Кини умсугуйан туран хоһоон суруйара уонна сөбүлүүр поэттарын хоһооннорун сахалыы тылбаастыыр этэ. Кини 2014 сыллаахха кулун тутар 30 күнүгэр 83 сааһыгар ыалдьан өлбүтэ.
- Улуустааҕы конференцияҕа оҕолор Николай Павлов олоҕун-дьаһаҕын, айар үлэтин кэпсээтилэр, кини тылбаастарын билиһиннэрдилэр. Маны таһынан, хоһоонньуттар күрэстэрэ, быыстапка, тылбаас куонкуруһа, олимпиада ыытылынна.
- Николай Гаврильевич улахан уола, Иммунопрофилактика киинин директора, медицинэ билимин хандьыдаата, сахалыы Бикипиэдьийэ саҕалааччыта Николай Павлов – Халан кэлэн учууталларга, үөрэнээччилэргэ аналлаах семинардары ыытта. Сүрүннээн, Бикипиэдьийэ үлэҕэ-үөрэххэ туһатын билиһиннэрдэ, слайдаларга көрдөрөн кэпсээтэ. Семинар истээччилэригэр анал сертификат туттартаата. Соторутааҕыта, Бикипиэдьийэ биллиилээх дьон туһунан билиһиннэрэр күрэһи ыыппыта. Күрэскэ Новосибирскайтан, Казаньтан, Уус-Алдан, Үөһээ Бүлүү улуустарыттан, Алтай республикатыттан, Дьокуускайтан 16 киһи кыттыбыта. «Улуустан төрүттээх дьон» анал аакка биир дойдулаахпыт Спиридон Борбуев 72 ыстатыйаны Бикипиэдьийэҕэ уган эрэллээхтик бастаата. Бу туһунан Николай Николаевич үөрэн-көтөн туран билиһиннэрдэ.
- Бу күн нуучча литературатын кабинетыгар Николай Гаврильевич Павлов аатын үөрүүлээх быһыыга-майгыга иҥэрдилэр уонна Александр Сергеевич Пушкин «Руслан и Людмила» поэматын тылбааһын билиһиннэрдилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети