«Хаҥалас-Ас» кэпэрэтиип үүт ас араас көрүҥүн оҥорууну баһылыыр

Мохсоҕоллоох бөһүөлэгэр «Хаҥалас-Ас» тыа хаһаайыстыбатын производственнай кэпэрэтиибэ саҥардыы атаҕар туран, үүт ас араас көрүҥүн оҥорууну баһылаан эрэр. Эдэр эрчимнээх салайааччы С.П. Латышев далааһыннаахтык дьаһайан, саҥа исписэлиистэри үлэҕэ ылан, олорор дьиэнэн хааччыйан, соҕурууттан аҕалбыт оборудованиеларын таҥан туруортаан, үлэ харгыһа суох барар тиһигин тэрийбит.

Мохсоҕоллооххо баар Кырдьаҕастар дьиэлэрэ уонна интэринээт дьиэ дуогабарынан үрүҥ аһы ыла олороллор. Олимпийскай эрэллэр училищеларын Үөһээ Бэстээххэ баар эрчиллэр-үөрэтэр лааҕыра атырдьах ыйын устата «Хаҥалас-Ас» бородууксуйатынан хааччыйыллыбыт. Тэрилтэ, үүт тутааччылары киллэрэн туран, 48 үлэһиттээх. Мантан сорохторо сайыҥҥы кэмҥэ эрэ үлэлииллэр.

- Тыа хаһаайыстыбатын министиэристибэтэ үүт харчытын эрдэ ыытан, быйыл үүт туттарыыта хаһааҥҥытааҕар да үчүгэй. Былааммытын толоробут, өссө эбии квота көрдөөрү сылдьабыт. Билигин «Кэскил» ТХПК күн аайы Төхтүртэн, Өктөмтөн, Нөмүгүттэн уонна Булгунньахтаахтан түөрт тоннаттан тахса үүтү тутан, үүт таһар массыынабытынан собуоппутугар аҕалар. Сороҕун Дьокуускайдааҕы үүт собуота ылар. Бу саҥа таҥыллыбыт тэриллэрбит толору кыахтарынан үлэлээн, оҥорон таһаарыыбыт сыыйа улаатан иһэр. Онон инникитин «Нөмүгү» агрофирматтан ураты, улууспутугар ыанар үүтү барытын манна астыыр буолуохпут,- диэн билиһиннэрэр дириэктэр Сергей Петрович. - Оҥорон таһаарар бородууксуйабыт 60-70% улууспутугар Мохсоҕоллооҕунан, Покровскайынан уонна Дьокуускай куорат маҕаһыыннарынан атыыланар.
Нэһилиэктэргэ баар арыы сыахтарбытыгар сылга 64 тонна ынах арыытын оҥоро олоробут. Онон улуус олохтоохторун 100% ынах арыытынан хааччыйыахпыт.
Кыһыҥҥы өттүгэр үлэ-хамнас тохтообокко барарыгар эмиэ эрдэттэн дьаһанан үлэлии сылдьабыт. Ол курдук, Нөмүгү нэһилиэгин олохтоохторуттан уонна тэрээһиннээх хаһаайыстыбалартан үүт тутуутун кыһыннары ыытыахпыт.
Инникитин үүт астан саҥа көрүҥнэри оҥорууну былаанныыбыт. Ол иһигэр КГТ дойдуларыттан үлэлии кэлбит дьоҥҥо анаан «Айран-тан» диэн утахтары оҥоруохпутун баҕарабыт. Кэскилгэ морс, сироп, йогурт, барыанньа араас көрүҥнэрин оҥорор сыах тэриниэхпитин наада буолуоҕа.
Бородууксуйабытын батарыыга ыарахаттары көрсөбүт. Онон күннэтэ саҥаттан саҥа тэрилтэлэри, улахан маҕаһыыннар ситимнэрин уонна оҕо саадтарын, оскуолалары кытта үлэлэһэбит.

«Хаҥалас-Ас» үлэһиттэрэ бары кэриэтэ эдэрдэр. Өлүөхүмэттэн төрүттээх технолог К.И.Софронова үлэ хаамыытын кыраҕытык кэтиир, хонтуруоллуур. Үлэтин быыһыгар үүт ас туһунан кылгастык маннык кэпсээтэ:
- Күҥҥэ түөртэн тахса тонна үүт кэлэр, ону астаан-таҥастаан таһаарабыт. Маны барытын хонтуруоллаан көрөбүн, атыыга үчүгэй хаачыстыбалаах бородууксуйа барарын ситиһэбин. Инникитин үлэбит былаана киэҥ, үүт аһын элбэтэн, эбии сыыр оҥоруохпутун баҕарабыт.
Ити курдук, «Хаҥалас-Ас» тыа хаһаайыстыбатын производственнай кэпэрэтиибэ үүт ас бородууксуйата улуус, өрөспүүбүлүкэ олохтоохторун сандалы остуолугар өрүүтүн баар буоларыгар кыһаллан үлэлиир.