Сарсыарда көтөн кэлээт, правительство чилиэннэрэ түөрт бөлөҕүнэн Өлөөҥҥө, Кирбэй нэһилиэктэригэр социальнай суолталаах объектарга уонна саҥа тутууларга, олоҕу–дьаһаҕы хааччыйар, тыа хаһаайыстыбатын объектарыгар сырыттылар.
Ол курдук, Галина Данчикова салайааччылаах бастакы бөлөх тулаайах оҕолору дьиэлээһин программанан Өлөөҥҥө 12 квартиралаах дьиэ тутуутун хаамыытын кытта билистэ. Салгыы хаарбах туруктаах дьиэттэн дьону көһөрүү федеральнай программанан тутуллубут, 2014 сыллаахха үлэҕэ киирбит 16 квартиралаах дьиэҕэ үлэ бэтэрээннэрэ Светлана, Михаил Харлампьевтарга ыалдьыттаатылар.
Өлөөҥҥө бу программанан былырыын үс 16 квартиралаах толору хааччылыылаах дьиэ тутуллан үлэҕэ киирбитэ. Истиҥ мичээрдээх хаһаайка Светлана сылаас, сырдык дьиэҕэ олороллоругар правительствоҕа, оройуон баһылыгар кыһамньыларын иһин махталын эттэ. Сылаас холумтаннаах толору хааччыллыылаах дьиэни «Адгезия» ХЭТ туппут.
Кэнники сылларга улууспутугар олохтоох матырыйаалтан таас дьиэлэри тутуу кэҥиир. 2011 сыллаахха икки этээстээх таас оскуола дьиэтэ дьэндэйбитэ.
Салгыы правительство бэрэссэдээтэлэ «АЛРОСА» АК үбүлээһининэн тутуллар этнокультурнай кииҥҥэ сырытта. Онно 50-с сылларга тутуллубут ис дьыала отделын дьиэтин саҥардан тутар туһунан боппуруоһу Галина Иннокентьевнаҕа туруорустулар. Маныаха кини бары министиэристибэлэр, оройуон салалтатын көмөлөрүнэн тутуллуон сөбүн эттэ.
Премьер-миниистир «Махтал» чааһынай маҕаһыыҥҥа сырытта. Урбаанньыт Саадат Магомедгазиеваттан сүрүн бородууксуйаны тиэйэр-аҕалар ороскуотун ыйыталаста, буулка, минньигэс туорт оҥорон атыылыылларын сэргээтэ. Салгыы сэргэстэһэ турар бэкээринэҕэ киирэн килиэп сыанатын көрдө, кэлэр бурдук хаачыстыбатын туоһуласта, олохтоох уустар чочуйбут Байанай ойуулаах мас оҥоһугу сөбүлүү көрөн атыыласта.
Бу кэнниттэн Галина Данчикова олохтоохтору приемнаата, кинилэр кыһалҕаларын болҕойон иһиттэ.
Маны сэргэ күнүс 12 чаастан СР Правительствотын бэрэссэдээтэлин бастакы солбуйааччы Павел Маринычев салалтатынан Өлөөн эбэҥки национальнай муниципальнай оройуон уонна сир баайын хостуур промышленнай компаниялар улуус сайдыытыгар туһуланар бииргэ үлэлээһиннэрин боппуруостарыгар анаммыт сүбэ мунньах буолла.
Оройуоммут сайдыытыгар сүҥкэн суолталаах СР Правительствотын көһө сылдьар мунньаҕа Өлөөн орто оскуолатын саалатыгар ыытылынна. Сүрүн тосхолунан оройуоммут сыл аҥарынааҕы социальнай-экономическай сайдыытын түмүктэрин ырытыы уонна 2020 сылга диэри сайдыы сүрүн хайысхаларыгар соруктары туруоруу, үлэни ыытыы буолла.
Мунньах түмүгэр Өлөөн орто оскуолатын алын сүһүөх кылаастарын учууталыгар Вера Соломоноваҕа СР Правительствотын Бочуотунай грамотата туттарылынна. Премьер-министир Галина Иннокентьевнаҕа «Өлөөн национальнай эбэҥки оройуонун бочуоттаах олохтооҕо» бочуоттаах аат инэрилиннэ.
Өлөөн баһылыга Александр Иванов оройуон төрүттэммитэ 80 сылын көрсө буолбут көһө сылдьар мунньах хотугу улуус кэскилин, сайдыытын түстэһиэҕэр эрэлин биллэрдэ.
Комментарии
Авторизация на сайте через социальные сети