Биллэрин курдук, тас дойдуга айаннара, кэлэллэрэ-бараллара хаарчахтанар дьон испииһэктэрин суут приставтара оҥороллор. Депутаттар итиник бэрээдэги кытта сөпсөспөттөрүн биллэрдилэр. Кинилэр этэллэринэн, киһи омук дойдутугар айанын суут эрэ быһаарыыта хаарчахтыан сөп. Ити туһуттан "Об исполнительном производстве" сокуоҥҥа киириэхтээх уларыйыылары, чуолкайдааһыннары бэлэмнээтилэр. Депутаттар киллэрбит ити сокуоннарыгар Россия Конституциятын сүрүн тирэх оҥостоллор. Дойду сүрүн докумуонугар ыйылларынан, киһи Россия тас өттүгэр мэһэйэ, харгыһа суох тахсар бырааптаах диэн сурулла сылдьар. Ону таһынан киһи көҥүлэ уонна бырааба федеральнай сокуонунан эрэ хаарчахтаныан сөп диэн этиллэр. Сокуон барылын көҕүлээбит депутаттар бигэргэтэллэринэн, тас дойдуга тахсыыны суут дьоһуннук уонна сөптөөхтүк сыаналыырын, туохтан сылтаан иэс үөскээбитин, төлөөһүҥҥэ баар кыһалҕаны барытын учуоттурун ойуччу тутан этэллэр.
Улахан мөккүөрү, күрдьүөттэһиини таһаарар сокуон барыла икки өрүттээх диэн быһа түһэн этиэххэ сөп. Атын өттүттэн ырытан көрөр буоллахха, тас дойдуга тахсыыны иэс төлөнүөр диэри тохтотуу – саамай көдьүүстээх уонна дьайыылаах дьаһал буолар. Ону суут приставтара туоһулууллар. Сыыппара сытыы чахчыларыгар олоҕурдахха, кэлиҥҥи 7 ыйга 1,1 мөлүйүөн киһи иэстэн сылтаан суолга хаайтарбыт. Итилэртэн 328 тыһыынчата алимент эбэһээтэлистибэтин толорботох дьон эбиттэр. Бу сыл кэлиҥҥи 7 ыйыгар приставтар 7,7 млрд.солк. күһэйии бэрээдэгинэн ирдээн төлөппүттэр.
Комментарии
Авторизация на сайте через социальные сети