Мустубут дьону, дьиэ иннигэр кэккэлээн турар баһаарынайдары улуус дьаһалтатын баһылыга А.В. Григорьев кэлэн иһэр Саҥа дьылынан эҕэрдэлээтэ уонна бу кэлбит саҥа техника инникитин улуус дьонун-сэргэтин нус-хас олоҕун араҥаччылыаҕар, баһаар буолар түбэлтэтигэр сыыдамнык тиийэн умуруорууга төһүү буолуоҕар баҕа санаатын эттэ.
Депутаттар оройуоннааҕы Сэбиэттэрин бэрэссэдээтэлэ М.А. Максимов бу Сунтаардааҕы баһаарынай этэрээт начальнига А.Б. Яковлев, улуус баһылыга сыралаах туруорсууларынан кэлбит массыыналар буолалларын иһитиннэрдэ.
Сунтаардааҕы баһаарынай этэрээт начальнига А.Б. Яковлев техникалары аҕалбыт суоппардарга махталын эттэ. Ол кэнниттэн массыына күлүүстэрин, сертификаттары Тойбохой, Сиэйэ, Сунтаар нэһилиэгин баһаарынай чаастарыгар үөрүүлээх быһыыга-майгыга туттартаата.
Комментарии
Авторизация на сайте через социальные сети