Саҥа дьиэҕэ киирии сиэрин-туомун Үөһээ Бүлүү Хампатыттан сылдьар Агафья Денисовна Макарова толоруутунан саҕаланна. Сиэр-туом толоруллубутун кэннэ СР ветеринарнай департаменын салайааччыта Л.И. Макарова, улуус баһылыга А.П. Атласов, улуус ветеринарнай управлениетын начальнига С.Д. Эверстов эҕэрдэ тылы эттилэр. Үгэс быһыытынан, саҥа дьиэҕэ киирии аалай лиэнтэтин Лариса Ивановна, Семен Дмитриевич уонна ветлечебница салайааччыта Мария Егоровна кырыйан мустубут дьону дьиэҕэ киллэрдилэр.
Саҥа дьиэ ис-тас бараанын кэрийэ сылдьан көрбүт кэннэ малааһыннаахтар ыҥырыылаах ыалдьыттарын, ветераннарын "Эрэл" ТХПК аһылык комбинатын банкетнай саалатыгар ыҥыран бэйэлэрин профессиональнай бырааһынньыктарын уонна саҥа дьиэҕэ киирии үөрүүтүн бэлиэтээтилэр. Үөрүүлээх күн бастакы, иккис түһүмэҕин Ирина Семеновна Винокурова олус сэргэхтик салайан ыытта.
Департамент салайааччыта Л.И. Макарова бастыҥ үлэһиттэргэ: С.Д. Эверстовка (управление начальнигар) уонна А.В. Поповаҕа (Хатырык ветучаастагар өр кэмҥэ үлэлээбит ветераҥҥа) "СР ветеринарнай сулууспатын туйгуна" бэлиэни, К.Н. Константиновка (1 Хомустаах) уонна В.Г. Захароваҕа (ветуправление) ТХМ Бочуотунай грамотатын, Г.В. Ивановаҕа (Хамаҕатта) т/х үлэһиттэрин профсоюһун президиумун Бочуотунай грамотатын туттарда.
Улуус баһылыга А.П. Атласов ветуправление начальнигар Эҕэрдэ суругу уонна дьиэ малын-салын атыылаһарга 200000 солк. суумалаах сертификат уонна Дь.А. Саввиноваҕа (Партизан) Бочуотунай грамотаны туттарда. СР ветеринарнай специалистарын ассоциациятын председателэ В.А. Куприянов Бочуотунай грамотанан С.К. Аргунованы (Ленскэй нэһ.) уонна Р.Д. Попованы (Хатыҥ-Арыы) наҕараадалаата уонна элбэх бастыҥ үлэһиттэргэ Эҕэрдэ суруктары туттартаата.
Управление начальнигын солбуйааччыта С.С. Колесов управление дьиэни тутууга үгүс сыраларын биэрбит Н.Л. Степановы уонна Г.П. Обутовы управление Бочуотунай грамотатынан, ветуправление начальнига С.Д. Эверстов 25 сылтан ордук кэмҥэ эҥкилэ суох үлэлээбит тэрилтэ үлэһиттэрин анал Бочуот Знагынан наҕараадалаатылар.
Комментарии
Авторизация на сайте через социальные сети