«Нина Иннокентьевна – мындыр, судаарыстыбаннай өйдөөх-санаалаах киһи этэ. Кини дьоҥҥо үтүө сыһыанынан, олоххо көҕүнэн, үлэҕэ дьулуурунан атыттартан уратылааҕа. Ол да иһин, дьон-сэргэ ытыктабылын ылыан ылбыта, саха суруналыыһын символынан буолуон буолбута. Киниэхэ үтүө санаа, дириҥ өй, күүстээх дьулуур хардырыта дьүөрэлэспиттэрэ. Нина Иннокентьевна суруналыыс эйгэтигэр кылаабынай эрэдээктэр быһыытынан өр сыл үлэлээн, үтүө аата Россия рекордун кинигэтигэр киирбитэ.
Оҕону, ыччаты патриот гына иитиигэ, чөл олоҕу киэҥник тарҕатыыга, сырдатыыга, эдэр суруналыыстары бэлэмнииргэ сыламтата суох дьаныардаахтык уонна дьулуурдаахтык үлэлээбитэ. Оҕо хаһыата уйугун буларыгар, салгыы сайдарыгар олоҕун бүтүннүүтүн анаабыта», - диэн эттэ Н.Е.Мординов-Амма Аччыгыйын аатынан бэчээттиир тэрилтэ дириэктэрэ Анатолий Гоголев.
Олоҕун бүтэһик күннэригэр диэри оҕону, ыччаты иитии боппуруостарыгар ис сүрэҕиттэн долгуйарын М.К.Аммосов аатынан ХИФУ ректора Евгения Михайлова бэлиэтээн эттэ. «Кинини балыыһаҕа тиийэн көрсө сырыттахпына “Өрөспүүбүлүкэм дьоно-сэргэтэ уонна балааһа мин тылбын истэллэрэ уонна ылыналлара. Онон, дьоллоох олоҕу олорон аастым” диэн миэхэ эппитэ”, - диэтэ Евгения Исаевна.
Кутурҕанаах миитиҥҥэ Саха сирин баһылыга, РФ суруналыыстарын сойууһун бэрэссэдээтэлэ уо.д.а. курутуйуу тылларын тиэрдэр телергаммаларын ааҕан иһитиннэрдилэр.
Итинник тыллары үөрэх миниистирэ Феодосия Габышева, Ил Түмэн наукаҕа, үөрэхтээһиҥҥэ кэмитиэтин бэрэссэдээтэлэ Антонина Григорьева уо.д.а эттилэр.
Комментарии
Авторизация на сайте через социальные сети