Быһылаан буолбут сиригэр полиция суһал-силиэстийэлиир бөлөҕө, ОМОН уонна РФ СК Саха сиринээҕи управлениетын силиэдэбэтэллэрэ үлэлииллэр. Ис дьыала миниистирэ Владимир Прокопенко дьаһалынан, полиция начальнигын суһал үлэҕэ солбуйааччы, полковник Александр Канин салайааччылаах холуобунай ирдэбил оперативниктара, эксперт-криминалист, ыттаах кинолог тиийбиттэр.
Силиэстийэ сабаҕалыырынан, от ыйын 10 күнүгэр Нүүйэ үрэх кытылыгар 10 киһи сынньана сылдьыбыт. Быһаҕынан анньыллыбыт 23 саастаах кыыһы түүн массыына иһиттэн булбуттар. Онтон үрэх сүүрүгүн таҥнары 200 м сиргэ 55 саастаах эр киһи уонна 56 саастаах дьахтар өлүктэрэ көстүбүттэр. Эр киһини быһаҕынан анньан, дьахтары муомахтаан өлөрбүттэр.
Бу чахчынан РФ Холуобунай кодексатын 105-с ыст. 2-с чааһын “а” пуунунан, ол эбэтэр, иккиттэн элбэх киһини өлөрүү бэлиэтинэн, холуобунай дьыала тэриллибит. Билигин бу үс киһини өлөрүүгэ уорбаланааччыны көрдүүллэр.
Маныаха “ватсабынан” “камуфляж” таҥастаах, хаайыыттан күрээбит киһи өлөрбүт диэн сураҕы тарҕаталлар уонна хайа эрэ киһи хаартыскатын ыыталлар. Ону ааһан, өлөрүөхсүт сынньана сылдьар дьоҥҥо остуолларыгар кэлэн олорсубутун, онтон массыына диэки барбытын, онуоха кыыс кинини эккирэтэн тиийбитигэр, түөскэ быһаҕынан анньыбытын, ол кэнниттэн балыктыы сылдьар дьахтардаах эр киһиэхэ тиийэн, иккиэннэрин өлөрбүтүн, сыаналаах малларын устан баран, атахха биллэрбитин туоһулар кэпсииллэр диэн сурах эмиэ тарҕанар. Төһө да ити “этэрбэс араадьыйатын” сураҕа буоллар, уорганнар биэрсийэ быһыытынан бэрэбиэркэлииллэр. Оттон ол бөрөстүүпүнньүк чахчы хаайыыттан күрээбит дуо?
Павел Макаров, РФ Накаастабылы толорор федеральнай сулууспатын Саха сиринээҕи управлениетын (УФСИН) пресс-сулууспата:
--Үс киһини холуонньаттан күрээбит хаайыылаах өлөрбүт диэн сурах оруна суох. Ленскэйдээҕи 8 №-дээх ураты режимнээх холуонньаттан ким да күрээбэтэҕэ, көс-учаастактан да таска ким да тахсыбатаҕа. Оттон “ватсапка” тарҕанар хаартыска туһунан быһаардахха, ити хаайыылаах бэс ыйын 16 күнүгэр босхоломмута, уоруу иһин элбэхтэ сууттаммыт рецидивист.
Маны тэҥэ, социальнай ситимнэринэн тарҕанар өлөрүүгэ уорбаланааччы фоторобот-хаартыскатын Силиэстийэлиир управление да, Ис дьыала министиэристибэтэ да оҥорботохторун бигэргэтэллэр.
* * *
Хас да сыллааҕыта икки-үс киһини тэҥинэн өлөрүү түбэлтэтэ, киһи дьиксиниэн курдук, биир сыл иһигэр элбэхтэ тахсан, мин ис дьыала уорганнарыгар өр сыл үлэлээбит опердары кытта кэпсэтэ сылдьыбыттааҕым. Күннээҕи олоххо-дьаһахха икки-үс, онтон элбэх киһини тэҥинэн өлөрүү төрүөтэ туохханый диэн тиэмэҕэ. Онуоха кинилэр быһаарбыттарынан, өлөрүүлэр биир сүрүн биричиинэлэринэн арыгылааһын буолар. Итиэннэ бэлиэтээбиттэрэ -- биирдэ киһини өлөрбүт, биирдэ илиитэ барбыт киһи, “ис кыраныыссата” сотуллан, иккис, үһүс киһини туоһу буолбутун иһин, чэпчэкитик суох оҥорор диэн. Ол эбэтэр, кыыла турбут киһи кэрээниттэн тахсан, оннук дьиикэй буолар.
Оттон саха сүдү эмчитэ Владимир Кондаков (өссө аҕыс сыллааҕыта) итинник ыар буруйдар төрүөттэрин маннык быһаарбыта: “Үрдүкү, үчүгэй эйгэбит ыһыллыыта баран эрэр. Иитиигэ сыыһа барда. Дьон тэҥэ суох буолла. Дьон иҥсэтэ көптө. Хараҥа күүс, хараҥа эйгэ улаатыыта барда. Аньыы-хара элбээтэ. Охсуһуу көр-нар кэриэтэ буолла. Киһини өйдөөбөт, сыаналаабат буолуу үөскээтэ. Олохпут отуора хамсаата. Үрдүкү күүстэр биһиги баппаппытын итинник салайан биэрэн, ол түмүгэ буолуон сөп”.
Комментарии
Авторизация на сайте через социальные сети