ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
4 декабря 2015, 14:59

«Сахабэчээт» Томпо улууһугар сурутуу хампаанньатын ыытта


Ахсынньы 2-3 күннэригэр «Сахабэчээт» автономнай тэрилтэ сүрүн дириэктэрэ Филипп Пестряков салалталаах айар бөлөх Томпо улууһугар Кириэс Халдьаайы, Мэҥэ Алдан олохтоохторун кытта көрсөн, сурутуу хампаанньатын бэрт тэрээһиннээхтик ыытан, ааҕааччылар махталларын ылан кэллэ.
Бастаан Кириэс Халдьаайыга Герой Охлопков аатынан орто оскуола дириэктэрин, Герой Охлопков төрөппүт уолун Александр Охлопковы кытта көрүстүлэр. Александр Федорович кэлбит ыалдьыттарга туһаайан, оскуола олоҕун-дьаһаҕын, ситиһиитин уонна аҕатын туһунан кылгастык кэпсээтэ. Ол кэнниттэн оскуола саалыгар Литература сылыгар анаммыт «төгүрүк остуол» ыытылынна. Манна суруйааччылар Данил Макеев, Владислав Доллонов уонна Галина Нельбисова айар үлэлэрин туһунан кэпсээтилэр, үөрэнээччилэр ыйытыыларыгар эппиэттээтилэр. Биллиилээх суруйааччы Анастасия Сыромятниковаҕа аналлаах миитиҥҥэ кыттыыны ыллылар.
Сарсыныгар Мэҥэ Алдан кулуубугар олохтоохтору кытта көрсүһүү олус истиҥник барда. Манна «Полярная звезда» сурунаал народнай суруйааччы Егор Неймохов «Великий снайпер России» киинэ сценарийа бэчээттэммит «Библиотечка» сыһыарыытын сүрэхтэниитэ буолла.
Суруйааччылар Кириэс Халдьаайы уонна Мэҥэ Алдан библиотекаларыгар сылдьан айар түмсүү чилиэннэрин кытта көрүстүлэр, 90 сааһыгар диэри «Чолбон» сурунаалы сөбүлээн ааҕар, куруутун сурутар Мария Сергеевна Колодезникованы кытта көрсөн истиҥник ирэ-хоро сэһэргэстилэр, махтал тылларын эттилэр уонна сэмэй бэлэхтэрин биэрдилэр.
Спорт бэтэрээннэригэр анаан бильярдка «Сахабэчээт» кубога оонньонно. Манна Николай Охлопков, Николай Потапов уонна Тимофей Степанов кыайыы үөрүүтүн биллилэр. Кинилэр кубогынан, дипломунан наҕараадаланнылар, хаартыскаҕа түстүлэр.
Киэһэ олохтоохтору эстрада ырыаһыта Виталий Очиров бастыҥ ырыаларынан эҕэрдэлээтэ, лотереята оонньонно, сурутуу акцията ыытылынна.
-- Томпоҕо «Сахабэчээт» күннэрэ олус бэркэ аастылар. Түмүк үчүгэй - аҥардас Кириэс Халдьаайыга биһиги бородууксуйабытыгар187 киһи суруттарда. Маннык акциялары салгыы өссө да ыытыахпыт, -- диэтэ «Сахабэчээт» сайдыыга дириэктэрэ Владимир Сыромятников.
При частичном или полном использовании материалов гиперссылка на сайт ysia.ru обязательна.
Категория: Территория Просмотров: 700 Источник: ЯСИА Автор: Иван Осипов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ