Егор Афанасьевич иһитиннэрбитинэн, сыл бастакы аҥаарыгар экономика көрдөрүүлэрэ кэлиҥҥи сылларга курдук, өрө тахсыбыттара бэлиэтэнэр.
Ньиэби хостооһун 3,1%, алмааһы хостооһун 10,8% улааппыт. Инвестиция кээмэйэ 6,7% аччаабыт. Көрдөрүү намтааһына чуолаан «Транснефть» уонна «Сургутнефтегаз» компаниялар үлэлэрин кэриҥэ кыччаабытыттан быһаччы тутулуктаммыт.
Саха сирин баһылыга бэлиэтииринэн, «Сибиир күүһэ» газопроводы тутууттан инвестицияҕа сыллааҕы былаан туолуохтаах. Өрөспүүбүлүкэ баһылыга экономикаҕа үтүө да, соччо бэрдэ суох да быһыы-майгы дьүөрэлэһэрин ыйда. Онуоха табаар бытархай атыытын эргиирэ 2,5% улааппыта уонна төлөбүрдээх өҥөнү оҥорууга наадыйыы аччаабыта сүрүн туоһу буолалларын ыйда. Ордук тырааныспарынан тиэйии, таһыы өҥөтүн оҥорууга дьон наадыйыыта биллэ кыччаабыт.
«Бу өҥөнөн дьон хото туһанарыгар баар уонна үөскээбит мэһэйдэри туоратыахтаахпыт. Сыыйа-баайа быһыы-майгы тупсуохтаах», - диэтэ баһылык.
Нэһилиэнньэ дохуотун кыччааһына улаханнык долгутарын Егор Афанасьевич ордук чиҥэтэн эттэ. Өрөспүүбүлүкэҕэ орто хамнас 52 тыһ.солк. Ол эрээри, итиниэхэ инфляция содулалаах. Хамнас төлөнүүтэ ураты болҕомто үөһүгэр туруохтааҕын кини ыйда.
«Өрөспүүбүлүкэ бюджетын бүгүҥҥү туруга куһаҕана суох. Бэйэбит уопсай дохуоппут 49 млрд. 187 мөл.солк. Нолуок быһыытынан 45 млрд.солк. киирдэ. Бу көрдөрүүлэр былырыыҥҥыны кытта тэҥнээтэххэ, үрдүктэр. Тэрилтэлэр көдьүүстээх үлэлэриттэн ити ситиһилиннэ», - диэтэ Егор Борисов. Кини бэлиэтээбитинэн, эбэһээтэлистибэ барыта туолан иһэллэрин ороскуот сыппаралара туоһулууллар.
Суол быраабылатыгар, Гражданскай кодекска, ДьКХ уонна доруобуйа харыстабылын эйгэлэригэр баар федеральнай сокуоннарга уларыйыылар киирэллэринэн, министиэристибэлэр, биэдэмистибэлэр салайааччылара нэһилиэнньэҕэ быһаарыы үлэтин күүскэ ыыталларыгар, улахан болҕомтону ууралларыгар Егор Борисов эттэ.
Халаан, навигация, көмүһү хостооһун, оттооһун, оттук кэмигэр бэлэмнэнии о.д.а. тустарынан мунньахха ырыттылар.
Комментарии
Авторизация на сайте через социальные сети