- Көмө хаһаайыстыба 57 гектар сиргэ туорахтаах култуураны ыста. Хортуоппуйу 3 гаҕа, хаппыыстаны 5 гаҕа, биирдии гаҕа моркуоп уонна сүбүөкүлэ олортулар. Теплицаларын уопсай иэнэ 1000 кв. м тахса. Онно оҕурсу, помидор, биэрэс, арбуз уо.д.а. олордоллор. Оскуола оҕурсуларын нэһилиэнньэҕэ атыылаабыта ыраатта. Араассаданы бэйэлэрин нэһилиэктэригэр эрэ буолбакка, Хаандыгаҕа эмиэ атыылаабыттара.
- Ыһыы кэмигэр 3 сменанан үлэлээтилэр, 2 маҥнайгы сменаларга улахан дьон сырыттылар. Агро-оскуола үөрэнээччилэрэ үлэ практикатын чэрчитинэн үһүс сменаҕа үлэлээтилэр. Уолаттар бааһына күрүөлэрин өрөмүөннээтилэр: 7-8 кылаас үөрэнээччилэрэ сиэрдийэ тастылар, 10 кылаастар күрүө туттулар. Ырааһырдыы чэрчитинэн аарканы, стадионы уонна уулуссалары ыраастааһыҥҥа субуотунньуктары ыыттылар. Үрдүкү кылаастар сойуустара Ыччат республикатааҕы ыһыаҕар бэлэмнэнии уонна ыытыы кэмигэр волонтерскай көмөнү оҥорорго быһаарыы ылыммыта.
- Сайыҥҥы кэмҥэ оскуола базатыгар "Аргыс" лааҕыр үлэлиэҕэ, манна икки этэрээт киирэр. "Көмүс гектарга" икки сезон устата орто звено 25 үөрэнээччитэ үлэлиэҕэ. Кинилэр үлэлэрэ - оҕуруот. "Аргыс" этэрээккэ үс сезон устата 40-нуу оҕо сылдьыаҕа. Кыргыттар оҕуруокка, уолаттар күрүө тутуутугар үлэлиэхтэрэ.
- Оскуолаҕа Тыа хаһаайыстыбатын министерствотын, улуус дьаһалтатын уонна тыа хаһаайыстыбатын салаатын өттүлэриттэн өйөбүл оҥоһуллар. Быйыл хортуоппуйу олордууга субсидия кээмэйэ 58074 солк. тэҥнэстэ, оҕуруот аһын олордууга - 187500 солк., уоҕурдууну атыылаһыы ороскуотун сабыныыга 140448 солк. көрүлүннэ, Хотугу сир тыйыс усулуобуйатыгар бородууксуйаны оҥорон таһаарыы иһин - 10280 солк., хортуоппуй сиэмэтин булунууга - 80%-нын, федеральнай бюджеттан агротехнологическай үлэни ыытыыга, тыа хаһаайыстыбатын бородууксуйата экологическай өттүнэн куттала суох буолуутугар, үүнүүнү үрдэтиигэ уонна сир хаачыстыбатын тупсарыыга 32900 солк. көрүллүбүтэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети