Сайын оҕолорго анаан өрөспүүбүлүкэтээҕи куонкурус бастакы түһүмэҕэ ыытыллан, оҕолор аны сэтинньигэ эмиэ “Кэнэҕэски инженер” диэн номинацияҕа киирсиэхтээхтэр. Оттон “СахаСелигерга” номнуо идэтийбит инженердэр уонна устудьуоннар куоталаһаллар. “Мин – инженербин” күрэстэһии тэрийээччилэринэн “Мин – инженербин” өрөспүүбүлүкэтээҕи техническэй үөрэх кыһаларын бүтэрээччилэр түмсүүлэрэ, Саха сирин Правительствота, Ыччат дьыалаларыгар уонна дьиэ кэргэн политикатыгар министиэристибэтэ, Үөрэх министиэристибэтэ уонна “Точка опоры” фонда буолаллар.
Хайысха салайааччыта, “Мин – инженербин” өрөспүүбүлүкэтээҕи техническэй үөрэх кыһаларын бүтэрээччилэр түмсүүлэрин бэрэссэдээтэлэ, Дьокуускай куорат Думатын депутата, Москватааҕы И.М. Губкин аатынан ньиэп уонна гаас университетын выпускнига Владимир Аммосов:
- Быйылгы күрэхтэһиибит биир сүрүн уратытынан "Инженердэр толкуйдара" диэн саҥа бырайыак буолар. Бырайыакка кыттааччылар Дьокуускай куоракка толору хааччыллыыны киллэриигэ саҥа ньымалары туһаныыга, сайыннарыыга, уулуссалары сырдатыыга, суолу оҥорууга инновационнай технологиялары туһаныыга, уу турбаларын тупсарыыга уо.д.а үлэлиэхтэрэ. Ыам ыйыгар диэри кыттааччылар үлэлэрин кэтэхтэн көрбүппүт. Онно талыллыбыт кыттааччылар бу форумҥа сыыһаларын-халтыларын көннөрөн, итэҕэстэрин туоратан, үлэлэрин өссө кэҥэтэн кэллилэр. Онон "СахаСелигергэ" кыттар үлэлэр бары кэриэтэ ситиһиилээхтэр, наадалаах бырайыактар. Бастыҥнары эрдэттэн бу диэн этэр кыаҕым суох.
“СахаСелигер-2015” форум иһинэн ыытыллар “Мин – инженербин” хайысхаҕа 37 ыччат кыттар. Өрөспүүбүлүкэбит араас промышленнай кииннэриттэн – Мииринэйтэн, Нерюнгриттан, Өлүөхүмэттэн о.д.а. улуустартан араас бырайыактаах дьон муһуннулар. Холобура, “Якутпроект” инженера Александра Винокурова (Дьокуускай куорат) Саха сиригэр дьону уонна таһаҕаһы таһар ханаат суол, идэтийбит инженер Василий Илларионов инбэлииттэргэ анаан биоэлектрическай протезтар, Светлэйдээҕи индустриальнай техникум устудьуона Иван Стовбыр нэһилиэктэри гааһынан хааччыйыы барылларын оҥорбуттара биһирэбиллээх.
Быйыл сайын Инженермэн диэн супер-дьоруой айыллыбыта. Кинини сайын оҕолорго ыытыллыбыт "Мин – инженербин" күрэхтэһии бастакы түһүмэҕэр эмиэ "Бэс Чагдаҕа" бастакыбытын көрбүппүт. Кини Саха сирин күүстээх уонна кыахтаах инженердэрин көрдөрөр түмүллүбүт уобарас. Инженермэн барыны бары сатыыр. Саха сиригэр буолуохтаах улахан тутууларга суолдьутунан, өй угааччынан буолар.
Комментарии
Авторизация на сайте через социальные сети