Соторутааҕыта В.Г. Павлов аатынан Сунтаардааҕы алын сүһүөх оскуола спортсаалатыгар Анна Алексеевна Бодогоева бирииһигэр остуол оонньуутугар өрөспүүбүлүкэтээҕи күрэс буолла. Манна барыта 64 кыттааччы хаамыскаҕа, хабылыкка күөн көрүстэ. Үөһээ Бүлүүттэн 10-ча киһилээх хамаанда кэлэн ыалдьыттаата. Ордук оскуола саастаах оҕолор көхтөөхтүк кытыннылар.
Үөрүүлээх тэрээһиҥҥэ Дьокуускайтан сахалыыостуол оонньуутун федерациятын толорооччу дириэктэрэ Н.Н. Кожурова, остуол оонньуутугар оҕолорго методист-инструктор А.Т. Андросова, Сунтаар улууһун остуол оонньуутугар федерациятын салайааччы М.В. Васильева, Сунтаар улууһун физкультура уонна спорт отделын кылаабынай специалиһа А.В. Николаев кэлэн кыттааччыларга эҕэрдэ тыл эттилэр. Остуол оонньуутугар спорт маастара Т.Е. Ксенофонтоваҕа остуол оонньуутугар өрөспүүбүлүкэ таһымнаах судьуйа бэлиэтин туттардылар.
Эрдэ биллэриллибитин курдук, кыттааччылар хабылыкка уонна хаамыскаҕа 3 бөлөххө арахсан оонньоотулар: 18 саастарыгар диэри оскуола оҕолоро, дьахталлар уонна эр дьон уонна доруобуйаларынан хааччахтаах дьон.
Ол курдук, кыргыттарга үһүс бочуоттаах миэстэни Үөһээ Бүлүүттэн Октя Васильева, иккис миэстэни Сунтаартан Аина Ксенофонтова, бастакы миэстэни Тойбохойтон сылдьар Гюзель Васильева ыллылар. Уолаттарга Кутанаттан Герман Игнатьев, Сунтаартан Миша Тертюхов, Үөһээ Бүлүүттэн Тамерлан Махаров кыайыылаахтарынан буоллулар.
Эр дьоҥҥо үһүс миэстэҕэ Уһун Күөлтэн сылдьар Борис Иванов, иккискэ Сунтаартан Николай Иванов, бастакы миэстэҕэ Үөһээ Бүлүүтэн Николай Терентьев тигистилэр. Дьахталларга үһүс миэстэни Таисия Ксенофонтова, иккис миэстэни Галина Семенова, бастакы миэстэни Үөһээ Бүлүүттэн Туйаара Варламова ыллылар.
Доруобуйаларынан хааччахтаах дьоҥҥо дьахталларга Наталия Еремеева - иккис буолла, Александра Алексеева бастаата. Эр дьоҥҥо үһүс миэстэҕэ Владимир Кетехов, иккис миэстэҕэ Кутанаттан Алеша Александров, бастакы миэстэҕэ Николай Егоров тигистилэр.
Оҕо уһуйаанын иитиллээччилэрэ күрэхтэһиигэ эмиэ бааллара. Кырачааннар уҥуохтарынан кыра, остуолга тиийбэт буолан, атахтарын төбөлөрүгэр тура-тура кыһаллан-мүһэллэн бэйэлэриттэн аҕа саастаах оҕолору кытары киирсибиттэрэ хайҕабыллаах. Саха төрүт остуол оонньуутугар өрөспүүбүлүкэтээҕи күрэхтэһииттэн дьон үөрүү, кыайыы аргыстаах тарҕаста.
Надежда Никитична Кожурова, СӨ саха төрүт остуол оонньуутугар федерациятын толорооччу дириэктэрэ:
– Анна Бодогоева бирииһигэр олохтоммут улахан күрэхтэһии сүрдээх тэрээһиннээхтик ааста. Ол гынан баран, бастакытын ыытыллар буолан, кыра алҕастар да, сыыһалар да бааллар. Остуол оонньуута «Манчаары» оонньууларыгар, Олоҥхо ыһыаҕар киирбитин да быһыытынан, баар ирдэбили, модьуйууну тутуһан ыраас оонньууну ирдиибит. Сорох оҕолор, уопуттаах да дьон быһа түһэн, ол аата эрийэ оонньуур эбиттэр. Ити сыыһанан ааҕыллар. Онон инники күрэхтэргэ бу сыыһалары көннөрүөхтэрэ диэн эрэнэбит. Күрэхтэһии кэмигэр оскуола оҕолоругар конференция ыытылынна. Оҕолор тиэмэлэрин наһаа үчүгэйдик арыйбыттар. Инникитин маннык конференция 2-3 сылга биирдэ ыытыллара буоллар диэн баҕа санаалаахпыт. «Инникигэ хардыы» курдук улахан конференцияларга кыттыахтара диэн эрэнэбит.
Итиэннэ методист-инструкторбыт Анжела Тимофеевна Андросова педагогтарга, иитээччилэргэ, учууталларга семинар ыытта, хабылыкка, хаамыскаҕа оҕону үөрэтэр методиканы билиһиннэрдэ. Анжела Тимофеевна оскуола иннинээҕи саастаах оҕолорго саҥа хайысханы киллэрдэ. Онон Сунтаар олохтоохторо семинарга сылдьан, кини уопутун тарҕа-тыахтара диэн эрэнэбит. Сунтаар улууһун остуол оонньуутугар федерацията 3 улахан тэрээһини бииргэ ыыппыта хайҕаллаах.
Комментарии
Авторизация на сайте через социальные сети