- Министерство салайааччылара «Бүлүү ыҥырар!» диэн Бүлүү эҥэр улуустар инвестиционнай форумнарын үлэтигэр кыттан баран, Сунтаар улууһуттан саҕалаан Бүлүүгэ тиийэ кытыы нэһилиэктэри кэрийэн, тыа сирин бүгүҥҥү кыһалҕатын илэ көрөн-билсэн, миэстэтигэр быһааран, дьаһаллары ылан иһэллэр.
- Даҕатан эттэххэ, быйыл министерство производственнай кооперативтар экономическай туруктарын чэбдигирдэргэ, хотоннору тутууга үбүлээһини көрөн хамсааһыны таһааран эрэр. Элбэх кооперативтаах Бүлүү улууһугар ити эмиэ быһаччы сыһыаннаах буолла.
- Министр А.Е.Артемьевы, сүөһү иитиитин, астыыр-үөллүүр, материальнай-техническэй хааччыйыы уонна үүнээйини үүннэрии департаменнарын салайааччыларын А.П.Герасимовы, А.К.Андреевы, А.М.Семеновы, мелиорация отделын начальнига А.Н.Афанасьевы, «Туймаада-Лизинг», «Сахаагропродукт» генеральнай директордарын Д.Д.Махаровы уонна К.Е.Тимофеевы улуус дьаһалтатын баһылыгын бастакы солбуйааччы В.Т.Лукин, тыа хаһаайыстыбатын департаменын салайааччы И.Н.Тарасов, «Сыа Бүлүү» улуустааҕы астыыр-үөллүүр кооператив директора А.А.Кондратьев, «Россельхозбаан» Бүлүүтээҕи филиалын салайааччыта И.Е.Рожин, Халбаакыттан оройуон Сэбиэтин депутата, «Олох суола» хаһыат редактора В.Н.Мандаров уо.д.а. арыаллаан сырыттылар.
- Ыалдьыттары Бүлүү кытылыгар сахалыы таҥастаах хотун далбардар айах тутан көрсүбүттэрэ биир долгутуулаах түгэнинэн буолла. Халбаакы нэһилиэгин дьаһалтатын баһылыга А.И.Васильев, солбуйааччыта А.М.Самсонов, дьаһалта специалистара, «Халбаакы» ПК салайааччыта В.Р.Протопопов, оскуола директора Нь.В.Афанасьев уо.д.а. Тойон Хонууга, Халбаакы таһыгар саҥа хотон тутуллуохтаах, агро-кластер тэриллиэхтээх сирдэригэр сырытыннардылар. Ыалдьыттар «Тоһуучаан» сайыҥҥы оҕо лааҕырын үөрүүлээх арыллыытыгар кытыннылар.
- Министр, департаменнар салайааччылара Тойон Хонууга сылдьан «Халбаакы» ПК ыытар ыһыы үлэтин билистилэр. ПК 156 га бааһынаҕа күөх маассаҕа анаан эбиэс үүннэриэхтээх, билиҥҥитэ үс сыллааҕыта «Росагролизинг» нөнүө ылбыт Т-154 тракторынан, былырыын 50% улуус көмөтүнэн ылбыт «Омичка» диэн элбэх операцияны оҥорор бурдугу ыһар тэрилинэн 100-тэн тахса ганы ыспыттар. Специалистар сэбиэскэй кэмҥэ таҥыллыбыт уу ыстарар, нүөлсүтэр ситими көрдүлэр.
- Министр, департаменнар салайааччылара Тойон Хонууга, Халбаакыга сырыылара үтүө түмүктээх буолла диэххэ наада. Министр көрөн-истэн, сүбэлэһэн баран, 2016 сылга куораттааҕы үүт собуотун реконструкциятын ыытарга, Халбаакыга сүөһү комплексын тутуутун быйылгыттан саҕалыырга, Тойон Хонуу уу ыстарар, нүөлсүтэр ситимигэр 2016 сылга үбүлээһинин көрөн, капитальнай өрөмүөнү ыытарга, Бүлүү улууһугар кластернай системаны киллэрэргэ быһаарыы ылынна, Халбаакыга тэриллиэхтээх агрокластеры бэйэтэ «Сарыал» диэн ааттаан эһиилгиттэн саҕалыахха диэн этии оҥордо.
- Министерство биир тутаах - материальнай-техническэй хааччыйыы уонна үүнээйини үүннэрии департаменын салайааччыта А.М.Семенов соторутааҕыта Халбаакы кураторынан анаммыта уларыйыылар тахсалларыгар биир төһүү күүс буолара саарбаҕа суох.
- Министр бу сырыытын саас Халбаакы, Мастаах эргин сылдьан, производственнай кооперативтарга көмө көрүллүөҕүн, куорат тула аграрнай ситим ситэри тэриллиэхтээҕин эппитин олоххо киллэрэн эрэр диэн сыаналыахха сөп.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети