Отчуот өр кэтэһиннэрбэккэ, болдьоммут бириэмэтигэр саҕаланна. Бастаан Анатолий Васильевич улуус дьаһалтатын сыллааҕы үлэтин олохтоохторго бэрт судургутук, өйдөнүмтүө гына билиһиннэрдэ. Онтон тутаах тэрилтэ салайааччылара сыллааҕы үлэлэрин түмүгүн туһунан иһитиннэрии оҥордулар.
Отчуокка олохтоохтор сүрүннээн Уһук Илиҥҥи региоҥҥа 1 га сир бэриллиитин, приватизацияламмыт сири регистрациялааһын, тыа хаһаайыстыбатын сокуонун барылын туһунан ыйыталастылар.
Сунтаар улууһугар сир баайа – гаас, ниэп саппааһа элбэҕин бары билэбит. Бу туһунан эмиэ боппуруос киирдэ. Биллэн турар, маннык үлэ айылҕаны алдьатар, буортулуур. Бу ыйытыыга Анатолий Григорьев бу курдук хоруйдаата: «Буровой үлэлэр бара тураллар. Манна экология, общественность өттүттэн күүстээх хонтуруол олохтонуохтаах. Онон соторутааҕыта Бүлүүтээҕи общественнай экологическай тэрилтэни кытары бииргэ үлэлииргэ сөбүлэһии түһэристибит. Манна нэһилиэнньэ актыыбынайдык кыттыахтаах».
Сунтаарга кирдээх ууну ыраастыыр оборудование тутуутугар 50 мөл. солкуобай көрүллүбүт. Эһиил үлэ саҕаланыахтаах. Чааһынай дьиэлэртэн канализация турбатын тардыы хаһан саҕаланарын туһунан олохтоохтор эмиэ туоһуластылар. Манна Анатолий Григорьев дьаһалта бырайыак оҥоруутугар үлэлэспитэ ыраатта, инникитин өрөспүүбүлүкэ, федеральнай программаларга киирэн, үлэлээтэхпитинэ сотору кэминэн сорукпутун ситиһиэхпит диэн эрэннэрдэ.
Ити курдук, үгүс боппуруос киирдэ. Балар бары аныгы олоххо, уларыйыы-тэлэрийии кэмигэр тыын суолталаахтар. Олохтоохтор мунаахсыйар боппуруостарыгар толору хоруйу ыллылар. Кэпсэтиигэ уопсайа уонча киһи кытынна. Түмүккэ, улуус дьаһалтатын сыллааҕы үлэтин бары биһирээтилэр. Сунтаар нэһилиэгин олохтоохторо быйыл саҥа талыллыбыт баһылыктарыгар эрэнэллэрин, өйүүллэрин көрдөрдүлэр, үтүө тыл үгүһүн эттилэр.
Комментарии
Авторизация на сайте через социальные сети