Кырачааннарга Иван Мигалкин «Куоска уонна кутуйах», «Ийэ уонна Алаа моҕус» остуоруйаларын пазл (хомулук) лоскуйдара киэргэтэн биэрдилэр. Оҕо остуоруйа дьоруойдарын хомуйан, толкуйдаан, айан-тутан таһаарарга үөрэниэ. Бу халыҥ хордуон кинигэ ураты оҥоһуута диэн суумка курдук тутаахтаах, оҕо ханна баҕарар илдьэ сылдьан оонньууругар, ааҕарыгар табыгастаах.
Евдокия Иринцеева, Альбина Борисова «Ньургун дьиктилээх сырыылара» диэн остуоруйаларыгар сэттискэ үөрэнэр Ньургун эһэтэ кэриэс гынан хаалларбыт тааһын сүтэрэн, атын эйгэҕэ ааны арыйан, дьиктилээхэй сырыыга түбэспитин оҕолоргутун кытта умсугуйа ааҕыаххыт. Гарри Поттер курдук саха ньургун уола абы-хомуһуну туттан, аптаах таас хаһаайына араас албаска да киирдэр, амарах санаатын ыһыктыбатаҕа, угаайыга киирэн биэрбэтэҕэ ааҕааччыны сөхтөрөр. Кинигэ тыыннаах курдук дьэрэкээн ойуута-бичигэ оҕолору остуоруйа алыптаах дойдутугар сиэтэн киллэриэ.
Умсуура «Чуораанчык уу дойдутугар» диэн улахан кээмэйдээх остуоруйа кинигэтигэр сүрүн герой, тыллаах-өстөөх чобуо уол Чуораанчык мүччүргэннээх сырыылара кэпсэнэр. Орто саастаах оскуола оҕолоро бу остуоруйаны ааҕа олорон, уу олохтооҕор Маттаҕа, үһү дойдуга, Алып Хара Аан Дарбыайга о.д.а. сиргэ сылдьыахтара.
Аатырбыт оҕо суруйааччыта Николай Носов«Билбэтчэй ыйга ыҥырар» остуоруйатын сахалыы тылбааһыгар кырачаан Билбэтчэй уол доҕотторун кытта ыйга көтүүтүн таһынан, интэриэһинэй сорудахтар, көрүдьүөс таайбараҥнар, оҕо бэйэтэ ас астыырыгар судургу ырысыаптар кинигэни сэргэхситэн биэрдилэр.
Россияҕа Литература сылын чэрчитинэн нуучча улуу суруйааччыта Лев Толстой «Оҕолорго» диэн остуоруйалардаах, үгэлэрдээх, кэпсээннэрдээх кинигэтэ таҕыста. Бу кинигэ алын кылаас оҕото ааҕарыгар анаан улахан буукубалаах, дьэрэкээн, чаҕылхай ойуулаах. Тулалыыр эйгэ, кыыл-сүөл нөҥүө суруйааччы кырачаан ааҕааччыны үтүөттэн мөкүнү араарарга, дьоҥҥо сайаҕас, амарах санаалаах буоларга үөрэтэр.
«Чуораанчык» сурунаал бибилэтиэкэтэ» диэн саҥа сериянан икки тылынан «Эрбэкэ-сэрбэкэ» уонна «Забава» алын кылаас оскуола оҕолоругар сорудахтар, оонньуулар, таайбараҥнар кинигэ биир өттө сахалыы, тиэрэ туттахха – нууччалыы. Араас таайбараҥнар, сэргэх оонньуулар, сонун сорудахтар, кыргыттарга кумааҕыттан кырыллар, таҥыннарыллар куукула, «Билии аартыгынан» умсугутуулаах остуол оонньуута оҕолор иллэҥ кэмнэрин туһалаахтык атааралларыгар көмөлөһүө.
Орто уонна улахан саастаах оҕолорго Дмитрий Собакин «Айылҕа кистэлэҥэ» кинигэтигэр киһи уонна айылҕа быстыспат ситимнээхтэрин, төрөөбүт дойдубут кэрэ көстүүтүн, айылҕа маанылаах кыылларын-көтөрдөрүн туһунан кэпсээннэрэ киирдилэр. Уус-уран хомоҕой тылынан суруллубут тэттик кэпсээннэр оҕону тулалыыр айылҕабытыгар харыстабыллаахтык сыһыаннаһарга, сиэрдээх майгыга, үйэлээх үгэскэ иитэр-үөрэтэр суолталаахтар.
Комментарии
Авторизация на сайте через социальные сети