- - Быйыл оҕуруот аһын - хаппыыстаны биэс, хортуоппуйу аҕыс га иэннээх сиргэ олордубутум. Хаппыыстабыт сүрүннээн «Мегатон», «Ринда» уонна «Слава» диэн суортар. Быйыл сайыммыт ардаҕа суох, ардаатаҕына даҕаны сири улаханнык илиппэт, кураан буолла. Онон хаппыыстаҕа ууну күн өрүү-өрүү ыстарбыппыт. Хайа да сыллааҕар элбэх ууну ыстардыбыт. Оттон хортуоппуйбутугар ууну биэстэ куттубут. Орто үүнүүнү ылар инибит. Бордууксуйабыт атыыга үчүгэйдик барара буоллар диэн баҕа санаалаахпыт,- диир Александр Викторович.
- Салгыы И.М.Яндреев салайааччылаах «Кэскил» бааһынай хаһаайыстыбатын бааһыналарыгар сырыттыбыт. Биһигини бааһынаҕа үлэлии сылдьар Иван Михайлович уола Владимир көрүстэ уонна сайыҥҥы түбүктээх үлэтиттэн быһа тардан маннык билиһиннэрдэ:
- - Уопсайа 10 га иэннээх сирдээхпит. Ити иһигэр моркуобу үс, сүбүөкүлэни биир уонна хортуоппуйу түөрт гаа сиргэ олордубуппут. Сайыммыт кураан буолан уу бөҕөтүн ыстардыбыт, онон үчүгэй үүнүүнү ылларбыт диибит. Быйыл хортуоппуй хомуйар саҥа комбайммытын боруобалыахпыт, техникабыт барыта баар. Дьэ ол гынан баран сэлээркэбит сыаната олус ыараата, - диир Владимир Иванович.
- Мин көрдөхпүнэ, бааһыналарга үүнүү куһаҕана суох, күһүҥҥү хомуур билиэ буоллаҕа. Үлэ киһитэ сайыны быһа сыралаһан туран үлэлээбитэ таах хаалбата, көмүс көлөһүнэ тиллэрэ буоллар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети