Амма ыһыаҕар Николай Захаров – Сахаачча бирииһигэр күрэхтэһии кыайыылааҕынан Владимир Никитин буолла

Бэҕэһээ буолбут Амма улууһун Улуу Кыайыы 70 сылыгар анаммыт уйгу-быйаҥ ыһыаҕын сүрүн түһүмэҕинэн күүстээхтэр күрэстэрэ буолла. Күрэс Саха сирин бүтүн Сэбиэскэй Сойууска аатырдыбыт Николай Захаров-Сахаачча бирииһигэр иккис төгүлүн ыытылынна.


Былырыыҥҥы күрэхтэһии кыттааччыларыгар 70 киилэҕэ диэри диэн хааччах баара. Оттон быйыл күрэхтэһиигэ кыттааччыга сааһынан да, ыйааһынынан да хааччах суох буолла. Күрэстэһээччилэр састааптара күүстээх буолла - Дыгын оонньууларгар, хотугу многоборьеҕа кыттыбыт спорт маастардара Ньурбаттан, Намтан, Дьокуускай куораттан муһуннулар.Кинилэри кытта биһиги ыччаттарбыт биэс көрүҥҥэ илин-кэлин түһүстүлэр.
Бастаан ыстаныы - үс төгүл үс, онтон салгыы мас тардыһыы, тутум эргиир, хапсаҕай уонна кууллаах сүүрүү. Кууллаах кумах ыйааһына 40 киилэ. Кыайыылаахха биллиилээх меценат, урбаанньыт Руслан Федотов „Нива“ массыынаны бириис туруорда.
Оттон бэтэрээннэргэ диэн 45-тэн аҕа саастаах дьон үс көрүҥҥэ күрэхтэстэ: ыстаныыга, хапсаҕайга уонна сүүрүүгэ. Манна кыайыылаахха убаһа бирииһэ оонньонно.

Быйаҥ ардаҕын аннынан Тойон түһүлгэҕэ күрэс былаан быһыытынан толору барда. Инчэҕэй, халтархай буолан мүччү-хаччы туттуу күрэх тыҥааһынын өссө күүркэттэ. Күрэһи Мэҥэ-Хаҥаластан мас тардыһыы солбуллубат комментатора, судьуйата Илья Скрябин саха многоборьетын историятын, күрэс хаамыытын, тыҥааһынын, киирсээччилэр ситиһиилэрин бэрт сэргэхтик кэпсээн түһүлгэни уонна көрөөччүлэри бииргэ ситимнээн сэргэхтик ыытта. Онон ардах төһө да тохтооботор, көрөөччүлэр күрэстэһии түмүгүн кэрэхсээн кэтэстилэр.
Ыстаныыга 30 м 34 см түспүт спорт маастара, СӨ рекордсмена Виталий Васильев кыайыылааҕынан буолла. Иккиһи 29 м 28 см ырааҕы түһэн Леонид Филиппов ылла. Үһүс миэстэҕэ 29 м 12 см көрдөрүүлээх Максим Борохин таҕыста.

Мас тардыһыытыгар Спартак Попов кыайда, иккис Владимир Никитин уонна үһүс Дьулустан Охлопков буоллулар.
Тутум эргииргэ помуос инчэйэн, сыыһа-халты туттуу элбэх буолла. Манна Кэбээйиттэн төрүттээх Дьокуускай олохтооҕо Егор Гуляев бастаата. Иккиһи Ньурбаттан Владимир Федоров уонна үсүһү Дьокууускайтан Дмитрий Лобунец ыллалар.
Хапсаҕай кэмигэр ардах тохтообокко түстэ. Түһүлгэ инчэйэрин ааһан онон-манан чалбахтанна. Тирэнэргэ халтархай буолан хапсаҕайдьыттар араас албастары көрдөрдүлэр. Манна Владимир Никитин кыайыы өрөгөйүн биллэ. Иккискэ - Дьулус Охлопков, үһүскэ Спартак Попов таҕыстылар.

Түөрт көрүҥ түмүгүнэн Владимир Никитин инники испитэ. Леонид Филиппов, Спартак Попов, Владимир Федоровэриэ-дэхси көрдөрүүлээхтэрэ. Кууллаах сүүрүү күрэс хаамыытын уларытыан сөбө. Ол эрээри Владимир Никитин бу да көрүҥҥэ иннин кимиэхэ да биэрбэтэ. Леонид Филиппов иккис бириэмэни көрдөрдө, онтон Степан Сутаков үһүс буолла.
Онон Мээндиги ыччата Владимир Никитин Николай Захаров – Сахаачча аатынан 2015 сыллааҕы күрэс муҥутуур кыайыылааҕынан буолла. Киниэхэ улуус баһылыга Николай Архипов уонна Руслан Федотов „Нива“ массыына күлүүһүн туттардылар. Иккис миэстэни Леонид Филиппов ылла, киниэхэ холодильник тигистэ. Үһүскэ Спартак Попов таҕыста, кини убаһанан бириэмийэлэннэ.

Бэтэрээннэр күрэстэригэр Лев Афанасьев эрэллээхтик кыайда - үс көрүҥҥэ үһүөннэригэр бастаата. Уонна убаһанан бириэмийэлэннэ. Иккис Михаил Романов буолла, киниэхэ уһанар станок туттарылынна. Үһүс буолбут Василий Слепцов „Парма“ эрбиигэ тигистэ. Күрэхтэһии кыайыылаахтара сыаналаах бириистэри кытта туһааннаах мэтээллэринэн уонна дипломнарынан наҕараадаланнылар.

Түмүккэ Николай Захаров – Сахаачча бииргэ төрөөбүттэрэ Леонид Филипповка убаһа сертификатын туттардылар.
Күнтэн-дьылтан мэһэйдэппэккэ элбэх ыччат кэлэн күрэхтэһэн, күүстэрин - күдэхтэрин, тулуурдарын, дьулуурдарын көрдөрөн, олус үчүгэй күрэхтэһиини көрөөччүлэргэ бэлэхтээтилэр.