Ааспыт сыллаахха дороххой аһылыгы бэлэмнээһиҥҥэ оройуон былаанын аһары толорбута. Быйыл от үүнүүтэ үчүгэй, онон тыа дьоно сорудахтарын толоруохтара диэн эрэл баар. Окко Бөтүрүөп күнүн кэнниттэн тахсааччылар. Билигин 123 тыраахтар, сүрүннээн кытай кыра тыраахтардара, ходуһаҕа таҕыстылар, от үлэтигэр 400-кэ киһи сылдьар. 332 гектар сир охсулунна уонна 240 т от бэлэмнэннэ. Мэҥэ Алдан нэһилиэгэр, холобур, 145 гектар сир охсулунна, 144 т от бэлэмнэннэ, Ыҥаа нэһилиэгэр 76 гектар охсулунна, 56 т от бэлэмнэннэ.
Дьон бэйэлэрин эрэ сүөһүлэригэр оттооботтор, кинилэр атыыга анаан эмиэ оттуохтарын сөп. Ол гынан баран оту батарыыга ыарахаттары көрсөллөр. Ол курдук, былырыын «Бордой» кооператив бэлэмнээбит 300 т сенаһын ким да ылбатаҕа. Ол кэмҥэ республика сорох оройуоннарыгар от тиийбэтэҕэ, кинилэргэ оту Амур уобалаһыттан кытта тиэйбиттэрэ. Бу боппуруоһу Тыа хаһаайыстыбатын министерствотын таһымыгар быһаарыахха наада.
Байаҕантай нэһилиэгэр отчуттар үгэс быһыытынан Алдан өрүс арыыларыгар оттооччулар. Ол эрээри манна биир кыһалҕа мэһэйдиир: кэннэки сылларга паром суох буолан, техниканы арыыга киллэрии кыаллыбат. Ол түмүгэр оттонор сирдэр хаалаллар, сэтиэнэххэ былдьаналлар. Дьон сүөһүтүн аҕыйатар.
Комментарии
Авторизация на сайте через социальные сети