Ити театр худуоһунньуктарын түөрт сыл буола-буола түмэр түһүлгэ быйыл 13-с төгүл ыытылынна. Фестивальга аан дойду биэс континеныттан 70 дойду, тыһыынча кэриҥэ сценограф уонна режиссер кыттыыны ылбыт. Бу түмсүү биир уратытынан сүүрбэ биэс театральнай площадкалаах, Европа биир саамай кыраһыабай тутуулардаах куората Прага бүттүүнэ фестиваль түһүлгэтинэн буолар. Онон бырааһынньыкка Прага барыта: олохтоохторо, театрдара, былыргы замоктара, интэриэһинэй, сиэдэрэй архитектуралаах дьиэлэрэ, церьковтар кытта кыттыыны ылаллар эбит. Дьиэни дьиэнэн тэнийэр араас инсталляциялар, готика, аныгы архитектуралаах тутуулар быыстарыгар туруоруллубут киһи толкуйун тургутан көрөр перфоменстар, уулуссаны сабардыыр худуоһунньуктар үлэлэрэ – барыта фестиваль күннэригэр Прага ураты көстүүтүнэн буолар эбит. Киһини сөхтөрөр кэрэ айымньылар быыстарыгар дьон, классик эппитинии, бары артыыстарга кубулуйар кэриэтэ буолаллара көрөргө ордук интэриэһи тардар буоллаҕа.
Фестиваль үгэс курдук икки хайысханан ыытыллар. Бастакы секция устудьуоннар үлэлэрэ уонна быыстапкалара. Иккис секция идэтийбит сценографтар уонна худуоһунньуктар үлэлэригэр ананар эбит. Лена Ивановна бу фестивальга кыттыыны ылбыта түбэһиэх буолбатах. Өссө устудьуоннуу сылдьан 80-с сылларга Лена Гоголева бииргэ үөрэнэр оҕолорун кытта бу фестивальга кыттан турар. Онон бу иккис сырыыта оччотооҕуга курдук худуоһунньук үлэтигэр араас идеялары, толкуйдары саҥа сүүрээннэри киллэрэрэ саарбаҕа суох. Лена Ивановна көрбүтүттэн-истибититтэн ордук сэргээбитин туһунан санаатын үллэстэр:
-- Бу фестивальга үчүгэйэ диэн сценография араас хайысхалара, сүүрээннэрэ барыта көрдөрүллэллэр. Худуоһунньуктар билигин араас жанрдары, стиллэри холбоон таһаараллара – бэйэтэ аан дойду барыта туһанар биллэр хайысханынан буолла. Онон олус интэриэһинэй. Быйылгы фестиваль темата «Общее пространство: музыка, погода, политика» диэн. Дойду-дойду хайдах сайдан иһэрэ, театр олох ханнык боппуруоһугар болҕомтотун уурара павильоннарыттан көстөр. Холобур, Прибалтика дойдулара үксүн политика тематыгар үлэлэрдээхтэр. Кинилэр тоҥуй уонна сабыылаах майгылара павильоннарыттан тутатына биллэр. Оттон илиҥҥи дойдулар аһаҕас майгылара сылааһынан илгэр. Кинилэр омос көрдөххө олус боростуой, архаичнай курдук оҥоһуктара ис-иһин сыныйан көрдөххө уран уонна ордук сиэдэрэй буолан үөрдэллэр. Кытай худуоһунньуктара былыргы форманы сэргэ аныгы технологияны холбоон сатабыллаахтык тутталлара сөхтөрөр. Арҕаа дойдулар ордук үс-түөрт кээмэйдээх инсталляцияларынан үлүһүйэллэрэ харахха быраҕыллар. Араас уустук инженернай технологиялаах трансформердар театрга эмиэ хото киирбиттэрэ көстөр. Оттон Украина инсталляцията «Театр – это место, где реальность является иллюзией» диэн ааттаах этэ. Манна ити аатын дэгэттиир экстремальнай көстүүмнэр бааллара киһини долгуппута. Театр араас мааскаларын кэрэхсии көрдүм. Тайлан, Тайвань, Индонезия быыстапкалара сиэдэрэй мааскаларынан уратылаахтар. Быстапкалары сэргэ театроведтар кулууптара үлэлээбитэ. Онон араас хаһыаттарга, сурунаалларга бу фестиваль туһунан элбэҕи ааҕыахха, билиэххэ, туһаныахха сөп.
Лена Ивановна көрбүтүтэ-сэргээбитэ, билэн турар, маннааҕар быдан элбэх. Сотору кэминэн биһиги Сахабыт театрын сценатыгар фестивальтан үөскээбит саҥа идеялара киириэхтэрэ диэн күүтэбит уонна эрэнэбит.
Лена Ивановна хас да үлэни бэлиэтии көрбүтүттэн көрүөҕүҥ.
Хаартыскаларга:
- Фестиваль эмблемата: «Халлаан күөх устууллар»
- Россия инсталяцията «Мейерхольд отдыхает». Утуйа сытар Мейерхольд суорҕана үллэҥнии тына сытар.
- Оттон сыттыгын кэннинээҕи хайдыбыт истиэнэни тахсан көрдөххө Мейерхольд тыына онно эмиэ биллэн, дьиэ эркинэ түллэҥниир эбит. Ону хайдах оҥорбуттара, дьэ, интэриэһинэй.
- Площадь театра. Оркестр-киһи.
- «Прометей прикованный», Венгрия. Биир саамай интэриэһинэй проект. 20 кв. миэтэрэлээх эргимтэ ортотугар сытар Прометей быара донордардар хаан бэристэхтэринэ, ол аата көрөөччүлэр көмөлөһөбүт диэн компьютерга ааттарын суруттахтарына уотунан тыган кэлэр. Оччоҕо кини аттыгар турар истиэнэттэн тахср сытыы тумустаах хотой төбөтө сүтэн хаалар эбит.
Комментарии
Авторизация на сайте через социальные сети