Улууска 1207 ынах сүөһү (онтон ыанар ынаҕа -- 497 төбө), 3426 сылгы (онтон -- 2184 биэ), 9317 төбө таба (онтон -- 4395 тыһы таба) баар. Тыа хаһаайыстыбатын управлениетын кылаабынай экэнэмииһэ Василий Бессонов иһитиннэрбитинэн, быйыл хайа да сыллааҕар кууруссаны иитэр ыал элбээбит. Түргэнник ситэр салаа ордук улуус киинигэр Уус-Ньараҕа уонна Томторго сайдыбыт. Ол курдук 374 төбө кууруссаттан олохтоохтор 9 тыһ. уст. сымыыты хамаҕатык батардылар.
-- Быйыл оттооһун былаанын 86% толордубут. Ордук тахсыылаахтык Томтор нэһилиэгин отчуттара оттоотулар -- былааннарын 90% толордулар. Уустук балаһыанньаҕа Төрүт нэһилиэгин олохтоохторо түбэстилэр. Кинилэр былааннарын 50% эрэ толорон, үгүс ыал сүөһүтүн кыстатарыгар ыарахаттар үөскээтилэр. Ол иһин өрөспүүбүлүкэ таһыттан 200 т оту атыылаһарга толкуйдана сылдьабыт. Эбии аһылыкка сайаапка биэрэн турабыт, -- диэн эттэ салайааччы.
Олохтоох тыа хаһаайыстыбатын бородууксуйатын оҥорон таһаарар хаһаайыстыбалары өйүүр сыалтан улуустааҕы "Идэһэ" дьаарбаҥката быйыл төрдүс сылын тэриллэн ыытылынна. Тыа сирин олохтоохторо бэйэлэрэ оҥорон таһаарбыт бородууксуйалара хамаҕатык атыыга батарыллар. Дьаарбаҥкаҕа бастакытын кыттар А.С. Кривошапкин уонна Г.П. Кривошапкинсалайар Төрүт нэһилиэгин бааһынай хаһаайыстыбалара убаһа этин 500 солк., быарын -- 1 тыһ. солк., сүрэҕи -- 300 солк., бүөрү -- 200 солк., иһи – 350 солк. хааны – 400 солк. туруорбуттара барыта атыыга барда.
Хомойуох иһин, кэлиҥҥи сылларга улууска сүөһүлээх дьон ахсаана аҕыйаан эрэр. Төрүөтэ -- сүөһү көрөөччү сааһырыыта. Онон тыа хаһаайыстыбатын управлениетын исписэлиистэрэ эһиилги сылга сүөһү ахсаанын элбэтиигэ анал тосхол оҥорон олоххо киллэрэр соруктаахтар.
Комментарии
Авторизация на сайте через социальные сети