Элгээйини Элгээйи дэппит улахан учуутал, токсидермист, уруһуйдьут, айылҕа музейын төрүттээччи Борис Андреев төрөөбүтэ 100 сылыгар анаммыт тэрээһин «Андреевскай ааҕыылартан» саҕаланна. Экологияҕа, оринтологияҕа, краеведенияҕа анаммыт ааҕыыга уопсайа 49 үөрэнээччи уонна 20 улахан дьон кыттыыны ыллылар. Ол кэннэ араас сылларга үөрэппит, уһуйбут юннаттара анал уруоктары ыыттылар, онтон музей устун экскурсия уонна «төгүрүк остуол» ыытылынна.
Үбүлүөйгэ бэлэмнэнэн араас элбэх үлэ барбыт. Ол курдук, Ил Түмэн депутата, биир дойдулаахпыт Семен Березин көмөтүнэн сорох саалалары 3Д форматынан көрөр чиэскэ кытта тиксибиппит. Бу аныгы технология көмөтүнэн дойду ханнык баҕарар муннугар олорор киһи музей сорох саалаларын көрөн интэриэһиргиэн сөп.
Олус долгутулаах уонна күүтүүлээх түгэнинэн Борис Андреев «Чижик» диэн тыыннааҕар доҕор оҥостубут туруйатынаан турар боруонса пааматынньыгын арыйыы буолла. Дьон-сэргэ Борис Николаевич илэ бэйэтинэн турар курдук ойууламмыта тоҕо да астыгай диэн санааларын үллэстэр.
Бу күн Айылҕа музейын төрүттээһиҥҥэ, сайыннарыыга үлэлэспит дьон улуус, республика таһымнаах бэлиэлэри, махтал, эҕэрдэ суруктары туттулар. Улахан киһи үбүлүөйэ өрө көтөҕүүлээхтик ааспытын үөрбүт-көппүт, астыммыт, дуоһуйбут дьон хараҕыттан да көрүөххэ сөп.
Комментарии
Авторизация на сайте через социальные сети