1390 кв.м. иэннээх улахан, киэҥ-куоҥ, сырдык киини арыйарга кыһыл лиэнтэни тэрилтэ салайааччыта Август Егоров, СӨ Бэчээккэ уонна телевидениенэн, радионан биэрии дьыалаларыгар департамент салайааччытын солбуйааччы Людмила Протопопова, «Хангаласский Газстрой» тутуу дирекциятын генеральнай дириэктэрин солбуйааччы Борис Гарифуллин дохсун ытыс тыаһыгар доҕуһуоллатан быстылар.
Иһирдьэ киирэн, Август Васильевич ыалдьыттарга мөлүйүөнүнэн кинигэ долбуурдарынан сааһыланар ыскылаатын көрдөрдө, манна киэҥ эрээттэр быыстарынан таһаҕас тиэйэр дьоҕус массыына холкутук ааһыан сөп. Салгыы 7-8 массыына турар сылаас гарааһы, аҕыйах тиражтаах кинигэни суһаллык бэчээттиир цифровой типографияны, иккис этээскэ тахсан, кинигэни тарҕатааччылары кытта үлэлиир офиһы көрөн, бары даҕаны дьон үлэлииригэр үчүгэй усулуобуйа тэриллибитин бэлиэтээтилэр.
Саҥа сиргэ үлэ тахсыылаах буоллун диэн аал уоту оттон, үрүҥ илгэнэн, арыылаах алаадьынан айах тутан, алгыс этилиннэ.
Малааһын бырааһынньыктаах остуолун тула ыалдьыттар үтүө санаа үтүмэнин, баҕа санаа бастыҥын анаатылар. СӨ Ил Түмэн спикерин Александр Жирков көмөлөһөөччүтэ Ньургуйаана Илларионова саханы саха дэтэр, норуот уус-уран тылын-өһүн, төрүт культуратын кинигэ нөҥүө киэҥ эйгэҕэ тарҕатар тэрилтэ кэскиллээх үлэтэ ситиһиилээх буоларыгар баҕарда. СӨ Бэчээккэ уонна телевидениенэн, радионан биэрии дьыалаларыгар департамент салайааччытын солбуйааччыта маннык улахан базаны кылгас кэмҥэ үгүстүк сүүрэн-көтөн туттарбыт, уотун, гааһын киллэрэргэ элбэх докумуон сүүрүүтүгэр түбүгүрбүт «Бичик» үлэһиттэригэр: Елена Поповаҕа, Филипп Протодьяконовка уонна Иван Васильевка анал грамоталары кытта хары чаһытын туттартаата.
Өр кэмҥэ Бэчээт департаменын салайбыт, билигин «Сахабэчээт» тэрилтэ салайааччыта Филипп Пестряков: «Кыһа дириэктэрэ Август Васильевич салайар талаанын, креативнай уонна прогрессивнай өйдөөх салайааччы буоларын билэбин, оттон үлэһиттэр бэйэҕит кэлэктиипкитинэн, тэрилтэҕитинэн киэн туттуугут улаатыахтаах. Долбуурга кэчигирэспит кинигэлэр туран хаалбакка улуустарынан тарҕанан истиннэр», -- диэн этэн туран, сертификат бэлэхтээтэ.
«Амма улууһа» МТ баһылыгын солбуйааччы Прасковья Емельянова: «Бичик» хаачыстыбата үчүгэй, сыаната удамыр диэн 13 сыл тухары сакааһынан 190 кинигэни таһааттардыбыт. Эһиилги бюджеппытыгар 2,5 мөл. солк. кинигэ таһаарыытыгар көрөнтурабыт. Ону таһынан, үтүө санаалаах спонсордар көмөлөрүгэр тирэҕирэбит, быйаҥнаах өҥ буордаах Амма талааннаах, үлэһит дьонун, айылҕатын фотоальбомнарга, үйэлээх кинигэлэргэ киллэрэр үлэбитин инникитин даҕаны салгыыр санаалаахпыт,» -- диэн инники былаанын билиһиннэрдэ.
Салгыы СӨ Суруйааччыларын сойууһун салайааччыта Иван Мигалкин, «Кыым» хаһыат кылаабынай эрэдээктэрэ Уйбаан Гаврильев, кинигэ кыһатын өр кэмҥэ бииргэ үлэлэһэр партнердара: «Книжный маркет», «Якутский книжный дом» о.д.а. улуус бэрэстэбиитэллэрэ эйэҕэс эҕэрдэлэрин тиэртилэр.
Түмүккэ тэрилтэ салайааччыта Август Егоров кинигэни тарҕатар киин аһылларыгар үлэлэспит дьоҥҥо барыларыгар махтанан туран, ааҕааччыларбытыгар саҥа интэриэһинэй бырайыактары бэлэмнии сылдьабыт, сотору «Саха ырыатын антологията», Оҕо энциклопедията, Сахабыт сирин хамсыыр харамайын энциклопедията күн сирин көрүөхтэрэ, онон кинигэ ис хоһооно, тас көстүүтэ тупсан иһэрин туһугар сонун сүүрээннэри киллэрэргэ былаан элбэх диэн элбэҕи эрэннэрэрдии эттэ.
Кинигэни тарҕатар киин аһыллыбытынан сибээстээн, бу күннэргэ 5 % чэпчэтии оҥоһуллар.
- Сүүстэ истибиттээҕэр биирдэ көрбүт ордук, онон, Сахабыт сиригэр саамай улахан кинигэни тарҕатар кииҥҥэ кэлэн сөбүлээбит кинигэҕитин талан ылыҥ!
Комментарии
Авторизация на сайте через социальные сети