- Бэс ыйын 12 күнүгэр быйылгы выпускниктарга үөрүүлээх банкет буолла. Оҕолортон сорохторо аармыйалыыр, сорохторо Чурапчы ыһыаҕар кытта барар буоланнар, биир сүбэнэн банкеты эрдэ тэрийдилэр.
- Олохтоохтор үүт туттарыытыгар көхтөөхтөр диэн дьаһалта специалиһа үллэһиннэ, ый аҥардыыта буола-буола үүт харчытын хойутаппакка ылаллар. Нэһилиэккэ 70-тан тахса киһи үүт туттарар.
- Икки эдэр ыал Тыа хаһаайыстыбатын министиэристибэтин субсидиятынан дьиэ-уот туттар, ону таһынан, уопсайа 7 ыал саҥа дьиэ тэринэр.
- Талааннаах дьонноох-сэргэлээх Дүллүкүгэ элбэх хоһоонньуттар бааллар. Кинилэр араас таһымнаах куонкурустарга көхтөөхтүк кытталлар. Ол курдук, «Сохраним реку Лену» диэн республикатааҕы күрэскэ нэһилиэктэн икки хоһоонньут: Дүллүкү күтүөтэ, эдэр суруйааччы Николай Васильев уонна үлэ бэтэрээнэ, охотовед Валерий Никифоров үлэлэрин ыыттылар, түмүктэри долгуйа күүтэллэр.
- Бэс ыйын 4 күнүгэр улуустааҕы «Алааһым арылы кустуга» хаартыска күрэһэр нэһилиэктэн үс киһи кытынна. Хаартысканы сөбүлээн түһэрээччилэргэ Мария Лазарева Гран-При үрдүк аатын ылан үөрдэ-көттө. Оттон оскуола үлэһитэСветлана Николаева уонна дьаһалта үлэһитэ Ирина Томская сертификаттарынан бэлиэтэннилэр.
- Боотулуу нэһилиэгэ
- Ходуһалар сабыллан тураллар диэн дьаһалта специалиһа биллэрдэ. Боотулууга хортуоппуй олордуута түмүктэммит, кэлин түспүт ардах өлгөм үүнүүнү эрэннэрэр. Улуус киинигэр кэлэр-барар суол туруга үчүгэй, сырыы баар. Оҕо лааҕыра күнү көтүппэккэ үлэлиир. Быйыл сүөһү-сылгы төрүөҕэ орто диэн кэпсииллэр. Олохтоохтор окко күүстээхтик бэлэмнэнэллэр.
- Быракаан нэһилиэгэ
- Нэһилиэккэ 21 күннээх эти-хааны чэбдигирдэр лааҕыр үлэлиир. Манна икки бөлөҕүнэн 27 оҕо сылдьар, оҕуруот үүннэриитинэн дьарыктанар, ону тэҥэ интэриэһинэй куруһуоктар ыытыллаллар. Салайааччынан Мария Борисова, иитээччинэн Александра Попова, эмтээччинэн Алевтина Кочнева, ас буһарааччынан Розалия Баянаева айымньылаахтык үлэлииллэр. Оҕолор үүннэрбит помидордарын, сүбүөкүлэлэрин о.д.а. оскуолаҕа туттарыахтара.
- Мэйик нэһилиэгэ
- Нэһилиэккэ бу күннэргэ тыа хаһаайыстыбатын специалистара тиийэн, сайаапкаламмыт сирдэринэн ходуһалары аһыыҥкаттан эмтээтилэр.
- Күүтүүлээх кулууп тутуута ньиргиччи бара турар, тутааччылар иһин гипсокартонун саайан бутэрэн эрэллэр.
- Нэһилиэккэ «Мохсоҕол» диэн уолаттар лааҕырдара ситиһиилээхтик үлэлиир. Оҕолор айылҕаҕа сылдьаллар, 2017 сылга ыытыллар үбүлүөйдээх Манчаары оонньууларыгар бэлэмнэнэллэр, тустуу албастарыгар үөрэнэллэр.
- Быйылгы ыһыах күүстээх бөҕөскө – Буучугураска ананна.
- Субсидияны туһанан эдэр ыаллар дьиэ тутталлар. Уопсайынан, сыллата иккилии ыал малааһынныыр диэн дьаһалта специалиһа үөрэ-көтө кэпсээтэ.
- Кырыкый нэһилиэгэ
- Нэһилиэккэ оскуола тутуута күүскэ барар. «Уран» ХЭТ биригээдэтэ тутууну ыытар. Санатан эттэххэ, оскуола 2016 сылга үлэҕэ киллэриллиэхтээх.
- Быйыл тыа хаһаайыстыбатын субсидиятынан биир ыал дьиэ туттан киириэхтээх, малааһынныахтаах. Икки ыал быйыл саҥа дьиэҕэ киирэр, оттон өссө икки ыал дьиэлэрин холлоҕоһун туруорар былааннаах.
- Олохтоохтор үүтү туттараллар. Быйылгы былааҥҥа 123 тонна турар, билиҥҥи туругунан 26 тонна үүт туттарылынна.
- Ходуһаларга күрүөлэри уларыттылар, уопсайа 2 көс уһуннаах күрүө саҥардылынна.
- Бу сайын Тыалыччым» муостатын ситэриэхтээхтэр, быйыл үлэҕэ киллэриллэрэ күүтүллэр.
- Олохтоох порду саҥардыы үлэтэ түмүктэннэ, көтөр балаһаны тэҥнээтилэр, бэлиэлэри, күрүөлэри туруордулар. «Ан-2» тиһигин быспакка дьону таһар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети