Быыстапкаҕа Иваново куоракка X-с төгүлүн ыытыллыбыт Бүтүн Россиятааҕы декоративнай искусство «Лоскутная мозайка России» фестивалыгар, Илиҥҥи экономическай форум чэрчитинэн Владивосток куоракка ыытыллыбыт Хотугулуу-Илиҥҥи регионнар культураларын фестивалыгар, «Европейский перекресток пэчворка» диэн аан дойдутааҕы фестивальга (Франция, Эльзас) ситиһиилээхтик кыттыбыт маастардар бастыҥ үлэлэрэ дьон-сэргэ көрүүтүгэр турда.
Быыстапканы арыйыыга А.Е. Кулаковскай аатынан Норуоттар доҕордоһууларын дьиэтин «Симэх» норуот искусствотын киинин салайааччы Александр Гоголев, «Хатыҥ Арыы нэһилиэгэ» МТ баһылыгын солбуйааччы Герман Марков, Нам улууһун культураҕа уонна духуобунай сайдыыга управлениетын начальнига Елена Заровняева, И.Е. Винокуров аатынан кыраайы үөрэтэр музей директора Афанасий Христофоров уонна норуот маастара Евдокия Петрова мустубут дьону эҕэрдэлээтилэр.
Тэрээһини «Дуораан» ырыа бөлөҕө уонна Петр Машников ыллам ырыанан киэргэттилэр. Күнүстэн киэһэ норуот маастардара баҕалаах дьоҥҥо маастар-кылаас ыыттылар. Быыстапка дьон көрүүтүгэр сэтинньи 27 күнүгэр диэри туруоҕа.
А.Н. Гоголев, «Симэх» норуот искусствотын киинин салайааччы: «Быйылгы улахан ситиһиибит сороҕун билиһиннэрэ кэллибит. Дьокуускайга эмиэ «Үрдүк сатабыл» диэн ааттаан быыстапканы туруорбуппут. Иваново куоракка ыытыллыбыт кырадаһынынан тигии Бүтүн Россиятааҕы фестивалыгар кыттан 5 киһи лауреат, 2 киһи дипломант уонна 1 киһи Гран-При үрдүк аатын ылбыттара. Бу бүтэһик көрсүһүү буолбатах. Өссө да кэлиэхпит. Бүгүн кэрэ аҥардар эрэ үлэлэрин аҕаллыбыт. Биһиги улуустарга элбэх эр дьон маастардаахпыт. Ол курдук, көмүсчүттэр, муосчуттар, мас, тимир уустара, туой оҥоһугу оҥорооччулар үгүстэр. Инникитин кинилэр үлэлэрин аҕалан көрдөрбүт киһи диэн баҕа санаалаахпыт. Ону өйүөхтэрэ диэн эрэнэбит».
Комментарии
Авторизация на сайте через социальные сети