-
Үүммүт сыл биһиги улууспутугар үгүс бэлиэ дааталары бэлэхтээтэ, олор ортолоругар биир бастакынан Уйбаан Гоголев төрөөбүтэ 85 сылын ааттыахха сөп. Оттон эһиил Социалистическай үлэ Геройа П.И.Быканов аатынан Халбаакы орто оскуолата 85 сыллаах үбүлүөйүн бэлиэтиэҕэ. Бу манна туһаайан Лаҥхаҕа бүгүн өйдөбүнньүк стелла үөрүүлээх быһыыга-майгыга аһылынна. Халбаакы олохтоохторун үөрүүлэрин үллэстэ алааска ыраахтан-чугастан элбэх ыалдьыттар тоҕуорустулар. Халбаакылар нэһилиэктэрин баай историятын кэрэһилиир миэстэҕэ - Лаҥхаҕа өйдөбүнньүк бэлиэ туруорулларын санаа ымыыта гынан илдьэ сылдьыбыттара ырааппыт. Бэйэлэрэ этэллэринэн, бу күн Кындыл аатын үйэтитиигэ бастакы хардыы оҥоһулунна. Ол аата инники да былаан элбэх.
-
Стелланы арыйарга Бүлүү улууһун депутаттарын Сэбиэтин бэрэссэдээтэлэ Г.С.Корякин, «Бүлүү улууһа (оройуона)» МТ баһылыгын социальнай политикаҕа солбуйааччы В.Ф.Тихонова, культура управлениетын салайааччыта Э.С.Петрова уонна Гоголевтар чугас аймахтара М.В.Софронова ыҥырылыннылар. Стелла аныгы матырыйаалларынан аһыллыбыт кинигэ быһыытынан оҥоһуллубут, тупсаҕай көстүүлээх, илин-кэлин өттүгэр айан дьоно бары өйдүүллэрин курдук нууччалыы суруктаах-бичиктээх буолан биэрдэ. Ол курдук биир өттүгэр: Уйбаан Гоголев мэтириэтин анныгар: «Здесь жил и учился народный поэт Якутии Иван Михайлович Гоголев», иккис өттүгэр: «Здесь, в местности Ланха, в 1930 году была открыта начальная школа. Первый учитель – Гоголев Михаил Николаевич» диэн суруллубут. Уонна икки өттүгэр иккиэннэригэр Кындыл хоһооннорун тыллара тиһиллибиттэр.
-
Бу бэлиэ өйдөбүнньүк Халбаакы оскуолатын дириэктэрэ Ньургустаан Владимирович Афанасьев көҕүлээһининэн, нэһилиэк олохтоохторо быһаччы кыттыыларынан, улуус дьаһалтата, «Күүлэт» ПО, «Туймаада-Лизинг» компартия көмөтүнэн олоххо киирбитин этэр тоҕоостоох. «Норуот күүһэ – көмүөл күүһэ» диэн мээнэҕэ эппэтэхтэрэ буолуо. Ол курдук, айар-тутар талааннаах учуутал Мария Валерьевна Сотрудникова стелла эскиһин уруһуйдаабыт, норуот маастара Прасковья Дмитриевна Ердашева оһуорун мындырдаан оҥорон, ханна да хатыламмат олохтоох колоритын эбэн биэрбит. Надежда Николаевна уонна Константин Харлампьевич Егоровтар тутуу цеменин аҕалан биэрбиттэр, Сергей Ильич уонна Ульяна Захаровна үбүнэн көмөлөспүттэр, Аркадий Аркадьевич Данилов стелла тимир күрүөтүн, Лидия Гаврильевна Афанасьева муоста тимирин төлөөбүттэр. Уонна да атын нэһилиэк олохтоохторо элбэх сыраларын ууран, көмүс көлөһүннэрин тоҕон, халлааны аахсыбакка, өйдөбүнньүк бэлиэ турарыгар кырата суох кылааттарын киллэристилэр. Ньургустаан Владимирович биир да киһини умнууга хаалларбакка, барыларыгар дохсун ытыс тыаһа доҕуһуоллаах Махтал суруктары туттартаата.
-
Ыҥырыылаах ыалдьыттар бэйэлэрин өттүлэриттэн эҕэрдэ тыллары эттилэр, үгүстэрэ эдэр эрчимнээх салайааччы Ньургустаан Владимирович саҕалааччы, көҕүлээччи быһыытынан элбэхтик сүүрэн-көтөн, үгүс киһини тылыгар киллэрэн, быһаарыылаахтык дьаһанан, бүгүҥҥү үөрүүлээх күн сүрүн «буруйдааҕынан» буолбутун бэлиэтээтилэр. Уонна быһаччы кыттыылаах нэһилиэк олохтоохторугар Махтал суруктары, сертификаттары туттардылар.
-
Үөрүүлээх күнү Халбаакы олохтоохторун, оскуола оҕолорун күүһүнэн туруоруллубут концерт түмүктээтэ. Бу курдук норуот поэта Уйбаан Гоголев хоһуйбут Хатыҥ мастаах Халбаакы биир дьоһун-мааны тутуунан киэркэйдэ. Бу күн дойду үрдүнэн биллэриллибит Литература сылын чэрчитигэр биллэр-көстөр тэрээһин буолан, саха дьоно сүгүрүйэр улуу суруйааччы аатын үйэтитиигэ биир кэрчик түгэн быһыытынан киирдэ.
12+
Комментарии
Авторизация на сайте через социальные сети