Бу күн гимназия аактабай саалатыгар Государственность күнүгэр анаммыт үөрүүлээх линейка ыытылынна. Ыалдьыттары "Нежность" үҥкүү ансаамбыла сахалыы үҥкүүнэн эҕэрдэлээтэ. Анастасия Петухова уонна Олеся Зяблева хомуска оонньоотулар, кыра кылаас үөрэнээччилэрэ төрөөбүт дойду, норуоттар доҕордоһууларын туһунан хоһооннору аахтылар.
Көрсүһүү кэмигэр Евгения Васильевна республика бары олохтоохторугар бу дьоһун суолталаах Государственность күнүн историятын кэпсээтэ. Бу кэнниттэн үөрэнээччилэр министри кытта аһаҕастык кэпсэттилэр, ыйытыылары биэрдилэр. Ол иһигэр Томпо оройуонугар оптоволоконнай сибээс кэлиитин, солкуобай бигэтэ суох туруга, Арҕаа дойдулар санкциялара республикаҕа дьайыыта, бөһүөлэктэри уонна суоллары тупсарыы, транспорт сырыытын сайыннарыы барыта таарылынна.
Уруок кэнниттэн гимназия директора Наталья Винокурова баһылыктаах делегация 5-7 кылаастар прогимназияларыгар сырытта. Манна Евгения Васильевна "Гимназия ТВ" оҕо телестудиятыгар юнкордары кытта көрүстэ, кинилэр ыйытыыларыгар хоруйдаата. Оҕолор баайга-дуолга уонна сиргэ сыһыаннаһыы министерствотын үлэтин-хамнаһын интэриэһиргээтилэр, Хаандыгаҕа саҥа гимназия хаһан тутулларын ыйыталастылар. Министр эппитинэн, гимназия тутуута 2016 с. программаҕа баар уонна 2018 с. түмүктэниэхтээх. Министр Хаандыгаҕа хаста да сылдьыбыта, бэйэтин санаатын үллэһиннэ. Кини бөһүөлэккэ аан бастакытын 2001 с. халаан уутун кэнниттэн сылдьыбыт. Оччотооҕуну уонна билиҥҥини тэҥнээтэххэ уларыйыы бөҕө буолбут диэтэ. "Эһиги өҥөҕүтүнэн бөһүөлэк тутуллар, сайдар, тупсар. Мин Хаандыганы сөбүлүүбүн",-диэтэ миниистир.
Үөрэнээччилэр уонна учууталлар миниистиргэ интэриэһинэй лекциятын уонна ыйытыыларга хоруйун иһин махтаннылар. "Үөрэнээччилэр оройуоҥҥа, республикаҕа уонна дойдуга буолар быһыыны-майгыны интэриэһэргииллэр эбит. Маннык көрсүһүүлэр улахан кылаас оҕолоро олоххо суолларын булалларыгар көмөлөһөллөр. Эдэрдэр Томпо оройуонун сайыннарыахтара",-диэн тоһоҕолоон эттэ Евгения Григорьева.
Комментарии
Авторизация на сайте через социальные сети