Бэс ыйын 15 күнүттэн Дьабыыл агро-оскуолатын үөрэнээччилэрэ 21 буолан үлэлии көһөн тахсыбыттар, Дьокуускайтан кадет кылааһыттан, Төҥүлүттэн, Майаттан, Балыктаахтан оҕолор эмиэ кэлбиттэр. Бастакы сезоҥҥа начальнигынан биология, химия учуутала Саргылана Сордоева, иитээччинэн Клара Андреева үлэлииллэр.
Наставнигынан урут сүөһүгэ илиитин араарбакка үлэлээбит Марелла Баишева, бостуугунан Егор Стручков анаммыттар.
Оҕолор 4 дьиэнэн олорон 33 ынаҕы ыыллар, 34 ньирэйи көрөллөр-истэллэр. Ынах сороҕо оскуола бас билиитигэр баар, нэһилиэнньэттэн 10 хаһаайыстыбаттан түмпүттэр. Ынахтары сарсыарда эрдэттэн биэстии буолан уочаратынан ыыллар. Күҥҥэ 200 л ыыллар эбит, үүтү Төҥүлүттэн «Хоту» ТХПК массыыната кэлэн ылар. Оҕолор ынаҕы ыылларын, ньирэйдэри аһаталларын таһынан хортуоппуйу көрөллөр-харайаллар, биир козалаахтар. Итиэннэ сайылыкка оскуола биир атыыр оҕуһу тутар.
Быйыл лааҕыр базатыгар оҕолор иллэҥ кэмнэрин атааралларыгар анаан спортивнай площадка, медик дьиэтэ тутуллубуттар. Иитээччилэр сынньалаҥҥа араас күрэхтэһиилэри, биэчэрдэри тиһигин быспакка тэрийэллэр.
Оҕолор сайылыкка лааҕыр үс сезонугар үлэлиэхтэрэ.
Комментарии
Авторизация на сайте через социальные сети