Өбүгэлэрбит иккис Ыспааһабы (атырдьах ыйын 19 күнэ) хотуур ортото дииллэрэ эбит. Оттон билиҥҥи техника үйэтигэр, хотуур ортолообокко хайаабакка, ардах эрэ мэһэйдээбэтэр чааһынайдар, бааһынайдар даҕаны аҕыйах күнүнэн сыллааҕы отторун булуналлар. Оттоон бүппүттэр да элбэхтэр. Арыый уустук балаһыанньа тэриллиилээх хаһаайыстыбаларга буолара уруккуттан да баар суол.
Өлгүм үүнүүлээх ааспыт 2014 сыл баччатыгар 26994 т оттоох этибит. Оттон, били, ыарахан кыстыктаах 2013 сыл бу кэмигэр 7824,2 тонна эрэ оттоно сылдьыбыттаахпыт. Оччолорго, кырдьык, балаһыанньа уустуга.
Быйыл туох да диэбит иһин, үтүө сайын турар. Сайын буолан баран, ама, ардыа суоҕа дуо?..
Ол эрээри, билиҥҥитэ улахан алдьатыылаах ардах суох. Сөпкө дьаһанан оттоотохпутуна хаалбыт кэмҥэ былааннаах от оттонуоҕар эрэл баар. Онно эппиэттэһэр сирдээхпит-уоттаахпыт, ханна баҕарар сөп буолар техника баар. Барыта бэйэбититтэн эрэ тутулуктаах.
Өрөспүүбүлүкэҕэ оттооһун туругар улууспут инникилэр кэккэлэригэр сылдьара истиэххэ үчүгэй. Тэтиммитин ыһыктыбатарбыт ханнык.
Комментарии
Авторизация на сайте через социальные сети