Программа ис хоһоонун санатар буоллахха, -- хас биирдии хаайыылааҕы, кини көнөр суолга турунан эрэрин-суоҕун куруук кэтээн көрөн, сыанабыл туруоран иһэр анал хамыыһыйалар үлэлииллэр. Ол эбэтэр, хаайыылаахтан бэйэтиттэн тутулуктаах – көҥүлгэ төһө түргэнник тахсара биитэр буруйун боруостуур усулуобуйатын чэпчэтэрэ эбэтэр төттөрүтүн, өссө кытаатыннаран, ыаратан биэрэрэ. Көнөр суолга туруммут киһини буруйун боруостуур усулуобуйатын сымнаталлар, ону ааһан, болдьоҕун иннинэ босхолуурга хадатаайыстыба биэрэллэр. Оттон режими мэлдьи кэһэр, холуонньа иһинээҕи ирдэбиллэри, бэрээдэги тутуспат, “злостный нарушитель” диэн дьаралыктаах хаайыылаах, үөһэ эппитим курдук, буруйун боруостуур усулуобуйата, төттөрүтүн, ыараан биэрэр. Дьэ, маны барытын хамыыһыйа быһаарар.
Маннык хамыыһыйалар (холуонньа аайы тус-туспа састааптаах) чилиэннэрин ахсаана тэҥэ суох буолуохтаах, тоҕо диэтэр, хаайыылаах дьылҕата бу дьон куоластааһынынан быһаарыллар. Итиэннэ хамыыһыйа быһаарыыта аһаҕас уонна сиэрдээх буоларын туһугар, хамыыһыйа састаабыгар холуонньа начальнига, тустаах үлэһиттэрэ эрэ буолбакка, уопсастыбаннай, религиознай тэрилтэлэр уонна СӨ Киһи быраабыгар боломуочунайын аппараатын бэрэстэбиитэллэрэ киирэллэр.
Мин УФСИН Уопсастыбаннай сэбиэтин чилиэнэ буоларым быһыытынан, “социальнай лифтэр” хамыыһыйаларыгар эмиэ баарбын. Ааспыт нэдиэлэ бүтүүтүгэр Табаҕатааҕы 7 №-дээх кытаанах режимнээх холуонньаҕа киирэн, хамыыһыйа үлэтигэр кыттыбытым. Онно үс чааһы быһа үлэлээн, 29 киһи матырыйаалын көрбүппүт. Үлэ хайдах быһыыга-майгыга барарын кылгастык быһаардахха маннык: хамыыһыйа чилиэннэрэ төгүрүччү олоробут, хаайыылаахтар уочаратынан биир-биир киирэллэр, киирбит хаайыылаах туһунан матырыйаалы этэрээт начальнига ааҕан иһитиннэрэр. Онтон хамыыһыйа чилиэннэрэ киирбит киһиэхэ ыйытыы биэрэллэр, ол кэнниттэн кинини кабинеттан таһаараллар. Хамыыһыйа быһаарыы ылынарыгар, дьүүллэһиигэ холуонньа “замполита” уонна психолога бу хаайыылаах туһунан эбии быһааран, чуолкайдаан биэрэллэр. Бүтэһиктээх быһаарыы, эппитим курдук, куоластааһынынан быһаарыллар.
Ити күн сорох хаайыылаахтар матырыйаалларын көрүү, быһаарыы ылыныы тыҥааһыннаах соҕустук, мөккүөрдээхтик барда. Оннук буолуохтаах даҕаны. Хаайыылаах хас сыыһа туттубута, үчүгэйи оҥорбута, үлэлиирэ-үлэлээбэтэ, үөрэнэрэ-үөрэммэтэ, эмсҕэлээччилэригэр иэһин төһө төлөөн иһэрэ -- барыта ыйааһын бэскитигэр ууруллар. Түмүккэ, 11 киһиэхэ буруйун боруостуур усулуобуйатын чэпчэтэргэ, сэттэ киһиэхэ болдьоҕун иннинэ босхолоноругар суукка хадатаайыстыба киллэрэргэ, икки киһини Табаҕа хаайыытын иһигэр баар көс-холуонньа учаастагар көһөрөргө уонна биир киһини уон хонукка дьиэтигэр баран кэлэригэр быһаардыбыт.
“Социальнай лифтэр” хамыыһыйалара ый аайы үлэлииллэр.
Комментарии
Авторизация на сайте через социальные сети