- Киин түһулгэҕэ массыынаҕа олорсон Аҕа дойду Улуу сэриитин кыттыылаахтара А.И. Николаев, Н.С. Николаев, П.И. Яковлев киирэн парады саҕалаатылар. Салгыы ытык ыһыах ыалдьыттара: Саха Республикатын ыччат дьыалаларыгар уонна дьиэ кэргэн политикатыгар министрэ А.С. Владимиров, Ил Түмэн депутата В.В. Тимофеев, С.В. Иванов – Телье, Г.Н. Васильнв – Мандар, Л.Г. Прокопьева – Уйулҕаана, Н.Е. Егоров – Линдин уо.д.а.киирэлллэр. Ыалдьыттары улуус баһылыга С.Н. Винокуров уонна оройуон Сэбиэтин бэрэссэдээтэлэ Г.С. Корякин арыаллаатылар. Сэрии сылларын оҕолоро, урбаанньыттар, общественнай тэрилтэлэр, нэһилиэктэр парадтаан киирдилэр.
- Үс геройдаах Үс Бүлүү туонатыгар Үс алгысчыт сиэри-туому тутуһан аал уоту аһатан, Үрүҥ Айыылартан көрдөһөн алгыс тылларын эттиллэр.
- Уйгу-быйаҥ ыһыаҕынан улуус олохтоохторун уонна ыалдьыттарын улуус баһылыга С.Н. Винокуров, Саха Республикатын ыччат дьыалаларыгар уонна дьиэ кэргэн политикатыгар министирэ А.С. Владимиров, оройуон Сэбиэтин бэрэссэдээтэлэ Г.С. Кояркин, куорат баһылыга А.Г. Шипков, Аҕа дойду Улуу сэриитин кыттыылааҕа, полковник, норуот хаһаайыстыбатын үтүөлээх үлэһитэ А.И. Николаев эҕэрдэлээтилэр.
- Ыһыах үөрүүлээх чааһыгар А.С. Владимиров “Муниципальнай сулууспа туйгуна” бэлиэни Дьөккөн баһылыгын солбуйааччы Н.Г. Степановка, “Эдэр ыччат политикатын туйгуна” бэлиэни Бүлүүтээҕи Россельхозбаан офиһын салайааччытыгар И.Е. Рожиҥҥа, “Учууталлар учууталлара” бэлиэни М.С. Томскайга, “Дьиэ кэргэн политикатыгар кылаатын иһин” бэлиэни Л.Я. Кононоваҕа уо.д.а. министерство, Ил Түмэн Махтал суруктарын туттарда. Улуус баһылыга С.Н. Винокуров “Улуус бочуоттаах олохтооҕо” бэлиэлэринэн А.П. Поскачины уонна Н.Д. Алексееваны наҕараадалаата. Куорат баһылыга А.Г. Шипков “Куорат бочуоттаах олохтооҕо” бэлиэлэри В.Х. Тимофееваҕа уонна Г.И. Николаеваҕа туттарда.
- Ыһыах ытык бэлиэтин –Дуоҕаны былырыыҥҥы ыһыах нэһилиэктэр икки ардыларынан күрэҕин кыайылааҕа Чернышевскай нэһилиэк баһылыга А.В. Протопопов улуус баһылыгар С.Н. Винокуровка киин түһүлгэҕэ киирэн туттарда. Баһылык Дуоҕаны анал сиригэр туруоран Бүлүү ыһыаҕын арыйда.
- Ыһыах культурнай чааһыгар «Өрөгөйдөөх Ыһыах» диэн киэҥ далааһыннаах театрализованнай дьүһүйүүнү көрдөрдүлэр. Араас таһымнаах куонкурустар, күрэхтэһиилэр түмүктэринэн кыайыылаахтар ааттаннылар.
- Ил Түмэн депутата Окоемов Юрий Константинович бирииhигэр «БҮЛҮҮ БООТУР» күрэхтэһии икки күн устата ыытыллынна. Кыайыыны Николай Николаев (Дьөккөн нэһилиэгэ) ситистэ уонна УАЗ-ХАНТЕР массыына хаһаайынынан буолла. Иккис миэстэҕэ былырыыҥҥы чемпион Владимир Михайлов (Чинэкэ нэһилиэгэ) тахсан 70 тыһ. солк. наҕараадаланна. Үһүс буолбут Евгений Григорьев (Бүлүү куорат) 50 тыһ. солк. биһирэннэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети