Күөрдэмнэр ыраахтан-чугастан кэлбит биир дойдулаахтарын кытта самаан сайыны көрүстүлэр

Күөрдэм нэһилиэгин олохтоохторо Улуу Кыайыы 70 сылыгар анаммыт үбүлүөйдээх ыһыаҕы ыһар кэмнэригэр былыта суох ыраас, үтүө да күн үүммүт. Нэһилиэк аҕа баһылыга Андрей Варламов аллаах атын миинэн үлэ, тыыл бэтэрээннэрин, сэрии кэмин оҕолорун, уруу-аймах дьон холуонналарын иннилэригэр дьоһуннук дьоруолата хаамтаран ыһыах киэҥ түһүлгэтигэр киирдэ. Түһүлгэ тула түптэ буруота унаарда.



Ыһыах ыҥырыылаах ыалдьыттарынан Хаҥалас улууһун саамай эдэр бочуоттаах олохтооҕо, көҥүл тустууга аан дойду боруонса призера, Азия чемпионатын кыайыылааҕа Леонид Спиридонов, өрөспүүбүлүкэтээҕи оҕо спортивнай оскуолатын дириэктэрэ Максим Куприянов буоллулар.
Нэһилиэк баһылыга Андрей Варламов ыһыах тэрээһинин туһунан бу курдук эттэ:
- Үбүлүөйдээх ыһыаҕы ытык кырдьаҕастарбытыгар анаан ыстыбыт. Ыраахтан-чугастан биһиги нэһилиэктэн төрүттээх үгүс киһи тоҕуоруһа мустубутуттан олуһун долгуйа үөрдүм. Бүгүҥҥү тэрээһиммитигэр элбэх көрүү-күрэстэр буолаллар. Дьокуускайга баар биир дойдулаахтарбыт түмсүүлэрэ «Эр Хоһуун» уоланнар күрэстэригэр сүрүн бириистэри туруордулар, эстрада биллиилээх артыыстарын аҕаллылар. Күн бэҕэһээ манна саҥардыллыбыт Албан аат өйдөбүнньүк стеллатын үөрүүлээх аһыллыыта буолбута.

Ыһыах түһүлгэтэ сөрүүн салгынынан илгийэн үөрүү-көтүү мунура суох. Ыраахтан-чугастан түмсүбүт аймах-билэ дьон түһүлгэлээн олорон самаан сайыны айхаллаан, арыылаах алаадьынан, сыалаах этинэн, кыынньа сылдьар биэ кымыһынан айах тутан бэйэ-бэйэлэрин эҕэрдэлэстилэр. «Уйгу-быйаҥ ыһыахха – уруу-аймах дьоннордуун» түһүлгэ көрүүтүгэр «Бастыҥ мааны сандалы» номинация бирииһэ Спиридоновтар аймахха тигистэ. «Халыҥ аймах» номинацияҕа Киприяновтар аймах, «Төрүт удьуор түһүлгэ» номинация Сидоровтарга, «Бастыҥ оһуор түһүлгэ» - Борисовтар аймахха тиксэн бука бары самаан сайын барахсан кэлбит үөрүүтүгэр уйдаран сырыттылар.
Нэһилиэк олохтоохторо «Уруйдан үйэлэргэ, Улуу Кыайыы өрөгөйө» театрилизованнайкөстүүнү туруордулар.
Тэрээһин быыһыгар «Ситим» Култуура киинин дириэктэрэ Александра Иванованы көрсөн кэпсэттим.
- Быйыл Аҕа дойду Улуу сэриитин кыттыылааҕа, «Албан Аат» уордьан кавалера Захаров Никита Ильич-Микииттэ аатынан оһуохай күрэҕин тэрийдибит. Туруу үлэһит киһи Самартай хочотун ыһыахтарыгар оһуохайы тэрийэрэ, көҕүлүүрэ. Кини Хаҥалас улууһун илин өттүгэр тэнийбит түөлбэ үҥкүүнү - «Хайҕатар» уонна «Кирпииччэлии» оһуохайы ордук таһаарара, кынат дьоно араас куолаһынан уһатан, сонотон өссө тупсараллар эбит. Ол курдук оһуохайа киэһэттэн саҕаланан сарсыарда күн тахсыар диэри тохтообокко барара үһү. Онон оҕолоро, сыдьааннара ылсыһан үөрүүлээх түһүлгэ тэрилиннэ,- диэтэ Александра Яковлевна.
Н.И.Захаров-Микииттэ аатынан оһуохай күрэһэр атын улуустартан аат ааттаан кытта кэлбиттэрэ дьону-сэргэни улаханнык сэргэхситтэ. Бу дьоро тэрээһин дьоһуннаах этээччилэринэн буоллулар: Тимофеева Е.Д., Адамова Г.Е.,Скрябина Арина, Аввкумов Дьулус, Львова Виолетта. «Кэскиллээх этээччи» аатын Ефимова Анжелика (II Дьөппөн орто оскуолатын 3 кылааһын үөрэнээччитэ) ылла. «Уран тыл» номинация Лазарева Катяҕа (Марковтар сиэннэрэ, Дьокуускай) тигистэ. «Бастыҥ этээччи» үтүө аатын Чурапчыттан сылдьар ыалдьыт Надежда Прокопьевна Потапова ылан үөрэн-көтөн барда.
Күн орто ааһыыта саха мындыр уустарын оҥоһуктарын, уран тарбахтаахтар сахалыы сиэдэрэй таҥастарын-саптарын көрүү ыытылынна. Киин түһүлгэҕэ фольклор уус-уран толорооччуларын «Төрүт дорҕоон түһүлгэтэ» көрүү буолла. Манна бириистээх миэстэлэри Чурапчыттан сылдьар ыалдьыт Надежда Потапова, Дьокуускайга мед.училищеҕа үөрэнэр Паша Лебедева , 7 саастаах Надя Иванова ыллылар.

Бииртэн биир оонньуу-көр сити курдук ситимнэнэн баран истэ. Киин сыанаҕа үбүлүөйдээх ыһыаҕынан, самаан сайын салаллыытынан эҕэрдэлии эстрада биллэр артыыстара Варя Ларионова-Ый Кыыһа, Гаврил Семенов, «Туймаада» ырыа ансаамбылын артыыһа Алексей Шадрин, араадьыйа хоругар ыллыы сылдьыбыт Наталья Ивановна Артемьева истиҥ тыллардаах, нарын ырыалары бэлэхтээн ытыс тыаһа хабыллар эҕэрдэтин туттулар.
Саамай кэтэһиилээҕинэн, күүтүүлээҕинэн уолан дьон «Эр Хоһуун» күрэстэрэ буолла. Уоланнар биэс көрүҥҥэ - тутум эргииргэ, мас тардыһыытыгар, ох саанан ытыыга, хапсаҕайдаһан тустууга уонна үс төгүл үс сахалыы атах оонньуутугар күөн көрүстүлэр, илин-кэлин түһүстүлэр.

Тутум эргииргэ икки мүнүүтэҕэ 21-дэ эргийэн Руслан Новгородов бастаата. Саха сирин спордун маастара Ньургун Егоров мас тардыһыыга бастакы, ох саанан ытыыга иккис, хапсаҕайдаһан тустууга бастакы, үс төгүл үс атах оонньуутугар иккис миэстэлэри ылан эрэллээхтик бастаата уонна 24 000 солк. сыаналаах «МР -155» саа хаһаайынынан буолла. Иккис миэстэҕэ тиксибит күтүөт киһи Анатолий Петров «Байанай» маҕаһыынтан 15 000 солк. сууммалаах сертификаты тутта. Үһүс миэстэни ылбыт күтүөт Руслан Новгородов аатырбыт уус Александр Данилов оҥорбут саха быһаҕын бэлэх тутта.
Киэһэ 9 чаастан «Ситим» Култуура киинигэр Христофор Горохов-Элгэстэй аатынан «Мин эйиэхэ ырыа бэлэхтиим» ырыа куонкуруһа тэрилиннэ. Сайыҥҥы сылаас сырдык киэһэ ылбаҕай ырыа истиҥэ, кэрэтэ, нарына ылланна «Иэйиилээх ырыаһыт» ааты - Екатерина Попова, «Көрөөччү биһирэбилин» - Тамара Артемьева, биһирэбили - Олег Платонов ыллылар. Гран-при хаһаайынынан Михаил Атласов ылыан ылла.

Оттон оҕолорго «Ымыылаах ырыаһыт» ааты Наташа Захарова ылла. Милена Борисова «Кэскиллээх кэрэ куолас» номинация кыайыылааҕынан буолла, «Көрөөччү биһирэбилинэн» Сахастал Иннокентьев биһирэннэ. «Сыл бастыҥ дебюта» ааты «Айархаан» ансаамбыл салайааччыта Юлиана Семеновна Скрябина ылла. Кыттыбыт дьон бука бары көрөөччү махталын ыллылар, дохсун ытыс тыаһы долгуйа иһиттилэр.
Күөрдэм дьоһун олохтоохторо, ыраахтан-чугастан кэлбит биир дойдулаахтарын кытта самаан сайыны көрсөн, ыһыах кырылыы кыынньа сылдьар уохтаах кымыһын астыныахтарыгар диэри истилэр, сыалаах эмис этин сөп буолуохтарыгар диэри сиэтилэр, оһуохайы оройуттан туттулар, оонньууну-көрү көҕүлүттэн ыллылар!