- Манна үс күн устата дойду 64 регионуттан 794 спортсмен, ол иһигэр 33 спорт үтүөлээх маастара, 169 норуоттар икки ардыларынааҕы кылаастаах спорт маастара, 38 комплект мэтээл уонна Пекиҥҥэ ыытыллар аан дойду чемпионатыгар путевка иһин киирсиэхтэрэ.
- Чемпионат бастакы күнэ дьахталлар 5 000 м сырсыыларынан түмүктэннэ. Старка Европа хамаанданан чемпионатын быйылгы призера Елена Коробкина (Москва, Липецкэй), быйыл Кореяҕа ыытыллыбыт аан дойдутааҕы Универсиада призера Гульшат Фазлитдинова (Москва, Башкортостан), 1 500 м сүүрүүгэ аан дойду чемпионатын призера, 1 000 м дистанцияҕа рекорд хаһаайына Юлия Чиженко (Санкт-Петербург, Москва), дойду 2012 сыллааҕы чемпионката Юлия Васильева таҕыстылар.
- Кинилэр ортолоругар Саха сирин үтүөлээх тренерэ Д.В.Колесов иитиллээччитэ, норуоттар икки ардыларынааҕы кылаастаах спорт маастара Наталья Леонтьева баар.
- Быһыйдар сүүрүүнү бытаан тэтиминэн саҕалыыллар. Онтон Елена Коробкина, Гульшат Фазлитдинова, Наталья Леонтьева уонна Юлия Чиженко буолан инники тахсан сырсааччыларыттан аттар атан бараллар. Биэтэккэ диэри икки эргиир хаалбытын кэннэ Елена Коробкина тэтимин эбэн инники түһэр уонна сүүрүүнү бастакынан түмүктүүр. Көрдөрүүтэ -15.57.59. Иккиһинэн Гульшат Фазлитдинова кэллэ — 16.01.26. Оттон үһүс бириэмэни — 16.05.68 - биһиги Наталья Леонтьевабыт көрдөрдө!
- Бу иннинэ дойду чемпионатыгар быһый кыыспыт алтыс, бэһис, төрдүс буолуталаабыта. Онон сүүһүн көлөһүнүн тилэҕэр аҕаан, уһун сыллаах дьулуурдаах, дьаныардаах үлэтинэн дьоһун түмүгү ситистэ, дойду бастыҥнарын ортотугар киириэн киирдэ. Буолаары буолан «олимпийскай» дистанцияҕа.
- Күрэхтэһии түмүгүнэн атырдьах ыйын 22-30 күннэригэр Пекиҥҥэ ыытыллар чэпчэки атлетикаҕа аан дойду чемпионатыгар кыттар дойду хамаандатын састааба сүүмэрдэниэҕэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети