ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
18 июня 2015, 14:30

Сыл иккис аҥарыгар коммунальнай өҥөлөргө саҥа тарыыптар олохтонуохтара


От ыйын 1 күнүттэн дьиэ-уот, коммунальнай өҥөлөр төлөбүрдэрэ ортотунан 11% үрдээн, 36 кв. миэтэрэ иэннээх толору хааччыллыылаах, гаастаах таас дьиэ кыбартыыратыгар олорор үс киһиттэн турар ыал нуорма быһыытынан төлөбүрэ муҥутаан 683 солк. улаатыаҕа. Счетчиктаах ыаллар төлөбүрдэрэ маннааҕар төһө эмит кыра буолуон сөп.

СӨ Сыана политикатын судаарыстыбаннай кэмитиэтэ икки тарыыбы олохтуур. Ол иһигэр дьиҥнээх экономическай уонна нэһилиэнньэҕэ анаан чэпчэтиллибит сыананы. Онон, ититиинэн, уотунан, гааһынан, уунан туһаныы ыйдааҕы төлөбүрдэрин толору, ол эбэтэр дьиҥнээх экономическай суоттааһынынан, төлүүрбүт эбитэ буоллар, хамнаспыт барыта онно барыа эбит. Холобур, Анаабыр улууһугар 63 кв. миэтэрэ иэннээх толору хааччыллыылаах таас дьиэ кыбартыыратыгар олорор үс киһиттэн турар ыал ыйдааҕы толору төлөбүрэ 53 тыһ. солк. тэҥнэһиэ этэ. Бу экономическай суоттааһыны ылан көрдөххө. Ол эрээри судаарыстыба көмөтүнэн, анаабырдар өҥө сууматыттан 8,6% төлүүллэр. Онон 49 260 солк. бюджет толуйар.

Нэһилиэнньэ билигин ититиинэн туһаныы төлөбүрүн 27,4%, итии уу 35,1% , тымныы уу 65,6%, канализациянан туһаныы 26,2%, электроэнергия 37,6%, итиэннэ коммунальнай өҥөлөр 30,4% эрэ төлүүр.

Өрөспүүбүлүкэҕэ олохтоох бюджеттан тарыып араастаһыытын толуйууга бу сылга 17,3 млрд солк. көрүлүннэ. Былырыын 15,7 млрд этэ. Бачча элбэх харчыны ханнык да регион уйуммат. Ол гынан баран, кэлин тарыыптары нэһилиэнньэҕэ уонна тэрилтэлэргэ араастаан улаатыннарар буоланнар, сорох субъектар тарыып сорох чааһын толуйууга бюджеттан харчы көрөн эрэллэр.

Кэлэр ыйдааҕы ороскуоппутун ааҕан көрдөххө, маннык хартыына тахсан кэлэр. Саамай улахан үрдээһин электроэнергияҕа бэлиэтэнэн, сыл иккис аҥарыттан 15% улаатыаҕа. Куоракка гаастаах дьиэҕэ олорооччулар 1 киловатт чааһа 5,09 солк. (былырыын 4,43 солк.) быһыллыбыт. Куоракка уонна тыа сиригэр электрическэй билиитэлэнэн туһанааччылар 3,56 солкуобайы (2014 сылга 3,10 солк.) төлүөхтэрэ.

Сыана ититиигэ 11%, оттук (таас чох, мас) 7%, тымныы ууга13,5%, итии ууга 12%,канализациянан туһаныыга13,5%, гааска 7,5%улаатыаҕа. Онон 63 кв. миэтэрэ иэннээх толору хааччыллыылаах таас дьиэ кыбартыыратыгар олорор куорат ыалын (үс киһилээх) нуорма быһыытынан ыйдааҕы төлөбүрэ 810 солк., оттон тыа сиригэр 583 солк. үрдүөҕэ. Ситэтэ суох хааччыллыылаах, 48 кв. миэтэрэ иэннээх куорат дьиэтигэр олорооччулар 365 солк., оттон тыа сирин олохтоохторо 163 солк. элбэх харчыны төлүөхтэрэ. Оттон 90 кв. миэтэрэ иэннээх гааһынан оттуллар чааһынай дьиэлээх куорат дьоно 449 солк. харчыны эбии ороскуоттуохтара (тыа сиригэр 364 солк.). Электричество уотунан ититиллэр дьиэлээхтэр төлөбүрдэрэ куоракка 623 солк., оттон улууска 504 солк. үрдүөҕэ. Ол эрээри анал прибордаах ыаллар, маннааҕар аҕыйах харчыны төлүөхтэрин сөп. Холобур, уу ороскуотун учуоттуур счетчиктаах ыаллар төлөбүрдэрэ икки төгүл намыһах буолуон сөп.

При частичном или полном использовании материалов гиперссылка на сайт ysia.ru обязательна.
Категория: Жизнь Просмотров: 727 Источник: Газета "Саха Сирэ" Автор: Анивера Акимова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ