Быйылгы 2015 сыл Саха Республикатыгар үөрэхтээһин эйгэтигэр оскуолаҕа киириэхтэрин иннинээҕи саастаах оҕолору үөрэтии сылынан биллэриллибитэ. Бүгүн Муома оройуонугар 7 оҕо уһуйааныгар 521 иитиллээччи сылдьар.
Оройуон үрдүнэн бу хайысхаҕа үгүс үлэ ыытылынна. Ордук уопут атастаһыытыгар, үлэ таһымын үрдэтиигэ кэккэ дьаһаллар бардылар. Ол курдук, сыл саҥатыгар иитээччилэр көмөлөһөөччүлэрин куонкуруһа тэриллибитэ, манна "Теремок" уһуйаан үлэһитэ Светлана Сидоренко кыайыылаах тахсыбыта.
Кулун тутарга үөрэх үлэһиттэрин оройуоннааҕы семинар-форумнарын чэрчитинэн буолбут "Мин уонна мин наставнигым" күрэскэ Улахан Чыыстай "Осикат" иитээччилэрэ А.С. Прокопьева уонна З.Н. Лебедева бастакы миэстэни ылбыттара. Оҕолору эбээн тылыгар үөрэтэр Анфиса Прокопьева республикатааҕы "Воспитатель года-2015" иитээччилэр күрэстэригэр ситиһиилээхтик кыттан лауреат үрдүк аатын ылбыта. Оттон ити уһуйаан сэбиэдиссэйэ А.И. Васильева республика үөрэҕин үлэһиттэрин атырдьах ыйынааҕы сүбэ мунньахтарын кэмигэр СР Государственнай Мунньаҕын (Ил Түмэн) Бочуотунай грамотатынан наҕараадаламмыта. Бу бүтүн оройуон үөрэхтээһинин ситиһиитэ буолара саарбаҕа суох.
Бүгүҥҥү күн туругунан үөрэх саҥа 2015-2016 дьылыгар 7 орто оскуола, 7 оҕо уһуйаана, 1 спортивнай оскуола, оҕо айар дьиэтэ уонна искусство оскуолата үлэлиэхтэрэ. 2015 с. олунньу 1 күнүттэн Төбүлэххэ, Чыбааҕылаахха, Соболооххо, Индигиргэ уонна Хонууга оскуолалар оҕо уһуйааннарын кытта холбоһон ыкса ситимнээх үлэлэрин саҕалаабыттара. Ити үлэ салгыы ыытыллыа.
Быйылгы үөрэх дьылыгар оройуон үрдүнэн 818 үөрэнээччи оскуолаларга үөрэх-билии ылар, ол иһигэр алын сүһүөх кылаастарга - 323 оҕо. Муома оройуонугар 2015-2016 үөрэх дьылын сүрүн соруктарынан буолаллар – федеральнай государственнай үөрэхтээһин стандартарын олоххо киллэриигэ материальнай-техническэй базаны бөҕөргөтүү, уопсай үөрэхтээһин хаачыстыбатын тупсарыы, уопсай үөрэхтээһин систематын сайыннарыыга кадрдары бэлэмнээһин.
Муома оройуонун педагогтара бу атырдьах ыйынааҕы сүбэ мунньахтарыгар араас хайысханан хайдыһан үлэлээтилэр. Ол курдук, Дьокуускай куораттан ИРОи ПК үлэһитэ, үөрэхтээһин политикатын уонна педагогическай бырайыактааһын киинин салайааччыта Д.К. Титов кэлэн ФГОС-у олоххо киллэрии уонна үөрэх хаачыстыбатын салайыы тиэмэтигэр куурус ыытта.
Итини таһынан үөрэх үлэһиттэрэ 273 №-дээхфедеральнай сокуоҥҥа олоҕуран үөрэх кыһаларыгар нормативнай-методическай үлэни хааччыйыыга, эдэр учууталлар уонна иитээччилэр "Эдэр педагог оскуолата" диэн семинардарга сырыттылар. Оҕо уһуйааннарын, алын сүһүөх уонна уопсай орто үөрэхтээһин учууталлара тус-туһунан секцияларга арахсан аныгы кэмҥэ сөп түбэһэр тосхоллору ырыттылар, биир идэлээхтэрин кытта уопут атастастылар, санаа үллэһиннилэр.
Сүбэ мунньах бастакы күнүгэр оройуоҥҥа үөрэхтээһин сайдарыгар кырата суох кылааттарын киллэрбит педагогтарга наҕараадалар туттарылыннылар. Ол курдук, оҕо айар дьиэтин үлэһитэ А.С. Ушницкая "Үөрэхтээһин систематын бочуоттаах ветерана" үрдүк ааты сүктэ. "Учууталлар учууталлара" бэлиэни Н.С. Тарабукин аатынан Улахан Чыыстай орто оскуолатын учууталлара В.П. Иванова уонна К.А. Баранова туттулар. В.Д. Лебедев аатынан Орто Дойду оскуолатын библиотекара Л.С. Старкова уонна Улахан Чыыстайдааҕы "Осикат" оҕо уһуйаанын педагога З.Г. Таркова СР бочуоттаах ветеранынанбуоллулар. "Саха сирин эрэлэ" бэлиэ Муома начальнай оскуолатын учуутала В.Л. Баишеваҕатуттарылынна. "Кэнчээри" оҕо уһуйааныгар үлэлээбит В.П. Чугунова "Оскуолаҕа киириэхтэрин иннинээҕи саастаах оҕолору үөрэтиигэ кылаатын иһин" бэлиэнэн наҕараадаланна. Оройуон оскуолаларын уонна оҕо саадтарын бастыҥ үлэлээх педагогтара СР Үөрэҕин министерствотын бочуотунай грамотатынан уонна махтал суругунанбэлиэтэннэ.
Оҕону үөрэтиигэ-такайыыга өр сыллаах үтүө суобастаах үлэлэрин иһин Муома начальнай оскуолатыттан А.А. Петрова, ити оскуола Суон Тииттээҕи филиалыттан А.В. Слепцов уонна Төбүлэх орто оскуолатын учуутала Е.П. Кириллина "Саха Республикатын үөрэҕириитин туйгуна" бэлиэнэн наҕараадаланнылар. Педагогтар күүстэринэн тэриллибит концерт көрөөччүлэр биһирэбиллэрин ылла – үөрэх үлэһиттэрэ ырыаҕа-үҥкүүгэ талааннаахтарын көрдөрдүлэр.
Комментарии
Авторизация на сайте через социальные сети