Оҕолору агрохайысханан туһулаан, предпринимательствоҕа сыһыарыыга Үөрэх министиэристибэтэ сылын аайы өрөспүүбүлүкэтээҕи бизнес-олимпиаданы тэрийэн ыытар. Онно 2013 сыллаахха биһиги оскуолабыт туйгун үөрэнээччитэ Вика Васильева (салайааччыта - оскуола директора Федорова Т.П.) «Организация пекарни» диэн бырайыагынан кыттан, бастакы миэстэни ылбыта. Салгыы бу үлэтинэн регионнааҕы Чугуновскай ааҕыыларга кыттан, эмиэ кыайыыны ситиспитэ.
Быйыл ол бырайыактара олоххо киирдэ. Соторутааҕыта Арыылаах нэһилиэгэр оскуолабыт бэйэтэ бэкээринэ арыйан, нэһилиэнньэҕэ анаан килиэп үтүүтүн саҕалаата. Биэкэринэн эдэр ыал аҕата Захаров В.М. үлэлиир. Аныгы сүүрээни киллэрэн, оскуола оҕолоро эбии харчыланаары, килиэби дьиэҕэ илдьэн биэрии өҥөтүн үөрэ-көтө оҥороллор. Былаан быһыытынан, агро-чаас чэрчитинэн оҕолор нэдиэлэҕэ иккитэ бурдук ас арааһын (пицца, бэрэски, пирог, торт, о.д.а.) астаан, нэһилиэнньэҕэ атыылыахтара. Өр кэм устата бэкээринэтэ суох олорбут буолан, нэһилиэкпит дьоно-сэргэтэ билигин оскуолаҕа махталлара улахан.
Төһө да оскуола дьиэтэ суох үлэлии олордорбут, үлэбит-хамнаспыт тэтимнээхтик барар. Ол курдук, быйыл оскуола эдэр үлэһиттэрэ «СИТИМ» (Союз Интересной Талантливой Интеллектуальной Молодежи) диэн ааттаах түмсүүнү тэриннилэр. Салайааччынан кэскиллээх эдэр үлэһит, химия учуутала Тарабукина А.Г. талыллан үлэлиир. «Ситимнэр» оҕолорго, нэһилиэк олохтоохторугар анаан сонун сүүрээни киллэрдилэр. Ол курдук, фитнес дьарык (салайааччы Антонова О.Д.), сувенирдары оҥоруу, иис уонна уус куруһуоктара (В.А., М.В. Яковлевтар) үлэлээннэр, дьон-сэргэ сэҥээриитин ыллылар. Салгыы нэһилиэнньэ кыаммат араҥатыгар тимуровскай тахсыылар (салайааччылар Тихонов И.В., Павлова М.И.) буолуохтара. Өссө оскуола олоҕун, ыытар үлэтин сырдатар хаһыат бэчээттэниэхтээх (салайааччы Печетова Л.С.).
Сонун, саҥа сүүрээннэри сатабыллаахтык олоххо киллэрэн, эдэр үлэһиттэрин бииргэ түмэн, нэһилиэнньэ ытыктабылын ылбыт, инникигэ тус көрүүлээх оскуолабыт салайааччытыгар Федорова Татьяна Петровнаҕа махталбыт муҥура суох. Татьяна Петровна айымньылаах үлэтигэр өссө да үрдүк ситиһиилэри, тус олоҕор дьолу-соргуны, доруобуйану баҕарабыт.
Татьяна ИВАНОВА, Леонид Попов аатынан
Арыылаах агро-оскуолатын производственнай
үөрэхтээһиҥҥэ дириэктэри солбуйааччы.
Комментарии
Авторизация на сайте через социальные сети