Ыһыаҕы Егор Григорьевич аймах-билэ дьоно –– бииргэ төрөөбүт быраатын Степан Григорьевич Слепцов оҕолоро, сиэннэрэ, кинилиин бииргэ алтыһан үлэлээбит табаарыстара тэрийдилэр. Степан Григорьевич сыдьааннара ыстаадаларыгар эһэлэрин аатын инэрбиттэрэ. Итини таһынан кинилэр «Истиҥа” диэн оҕо сайыҥҥы лааҕырын аспыттара. Манна Слепцовтар оҕолоро табаһыт уустук идэтигэр кыра эрдэхтэриттэн уһуйуллаллар. Дьэ онон табаһыттар ыһыахтара С.Г. Слепцов аатынан ыстаада сиригэр-уотугар буолла.
Ыһыах сиэрин-туомун Е.С. Слепцов сиэн балта эвен культуратын пропагандиһа, энтузиаст Зоя Степановна Садовникова толордо, өбүгэ үгэһинэн уот аһатан ыалдьыттары эҕэрдэлээтэ. Ол кэнниттэн, өрүү буоларын курдук, культурнай, спортивнай тэрээһиннэр көхтөөхтүк ыытылыннылар. Уучах (көлүллэр таба), ат сүүрдүүлэрэ, сүүрүүгэ, маамыктаны быраҕыыга күрэхтэһиилэр ыытылыннылар, үгүс дьон болҕомтотун тартылар. "Истиҥа" дьиэ кэргэн лааҕырын оҕолорун “Эгдьэн Мола” ансамблларын, Улахан Чыыстайдааҕы "Һээку" үҥкүү ансамблын концертара буолла. Ыһыах үөрүүлээх концерын ыҥырыылаах ыалдьыт, эбээн ырыаһыта Дмитрий Лебедев киэргэттэ.
Чуум үлэһиттэригэр "Чуум хаһаайката" күрэс интэриэһинэйдик барда. Чуум бастыҥ хаһаайкатынан Светлана Садовникова буолла, Евдокия Слепцова, Сардаана Тарабукина иккис-үһүс буоллулар. Сээдьэһиттэр Зоя Садовникова, Евдокия Слепцова, Иосиф Слепцов, Анисия Соркомова, Раиса Старкова, Акулина Николаева сарсыарда күн тахсыар диэри үҥкүү тылын эттилэр.
Икки күннээх ыһыах тэрээһиннэриттэн биир саамай сэргэхтэрэ –– табаһыттар сүбэ мунньахтара буолла. Мунньаҕы Улахан Чыыстай аҕа баһылыга Павел Маркович Мараказов салайда. Манна табаһыттар баар балаһыанньаны дьүүллэстилэр, санаа үллэһиннилэр, кыһалҕаларын быһаарыстылар.
Ыһыах ыалдьыттара, кыттааччылара хаһаайыттарга - С.Г. Слепцов аатынан община үлэһиттэригэр – Егор Григорьевич аймахтарыгар үгүс махтал тыллары эттилэр. Оттон кинилэр нэһилиэк баһылыгар П.М. Мараказовка, ыстаадаҕа дьону тиэйбит, ыһыах тэрээһинин малын-салын таспыт суоппардарга Иван Тарковка, Егор Даниловка, Василий Филипповка, Михаил Громовка, бириистэри туруорбут ИП Ольга Мараказоваҕа, Татьяна Гагиеваҕа, концеры тэрийбит Саргылаана Корякинаҕа, о.д.а. истиҥник махтаннылар, маннык ыһыахтар инникитин да тэриллиэхтэригэр баҕардылар.
Комментарии
Авторизация на сайте через социальные сети