Атамай былыргыта Ала Ууһа дэнэрэ. 1931 сыллаахха диэри Нам оройуонугар киирэн II Атамай диэн ааттанара. Билигин Атамай нэһилиэнньэтэ 700-чэкэ, оскуолатыгар 126 үөрэнээччилээх, 70 миэстэлээх толору хааччыллыылаах оҕо саадтаах.
Ыалдьыттарга анаан күн устата араас тэрээһиннэр тэрилиннилэр. Ол курдук, нэһилиэк тэрилтэлэрин үлэлэрин-хамнастарын билистилэр, бэйэлэрин үлэлэрин кэпсээтилэр, билиһиннэрдилэр. Ыччаттар спорт көрүҥнэригэр күрэхтэстилэр, нэһилиэк олохтоохторун уус-уран оҥоһуктарын быыстапкатын көрдүлэр.
Ыалдьыттарга анаан тимир уһаарыытыгар маастар-кылаас көрдөрдүлэр. Ол курдук, тимир уһаарыытынан дьарыктанар олохтоох маастардар Герасимов В.И., Попов М.М., Намтан сылдьар хомус ууһа Уваров Нь., Дьокуускай куораттан Данилов А.. 4-5 кг. болгуону уһаардылар, кэлбит ыалдьыттарга кэпсээтилэр. Инникитин аны атамайдарга баран, кинилэри кытта тимир уһаарыытын былааннаатылар. Атамай оскуолатын хореограба Сивцева Ж.В. дьахталларга уонна кыргыттарга маастар-кылаас ыытта. Ону таһынан “Тускул” ферматыгар сылдьан саха ынахтарын көрдүлэр–иһиттилэр.
Атамайдар кэлбит сыаллара-соруктара – биһиги нэһилиэктэрбит биир аҕа ууһуттан, Ала ууһууттан силистээхпит-мутуктаахпыт диэн, төрүппүтүн-ууспутун дириҥэтэн үөрэтиэххэйиҥ диэн. Онно аналлаах "төгүрүк остуол" ыытылынна. Кэпсэтиигэ ыалдьыттартан кыттыыны ыллылар “Атамай нэһилиэгэ” МТ баһылыга Федоров Р.К., баһылык солбуйааччыта Васильева К.М., кыраайы үөрэтэр музей үлэһитэ Васильева А.Я., олохтоох библиотека үлэһитэ Ефремова Е.Н., “Тирэх” ветераннар сэбиэттэрин салайааччы Филиппова К.Д., общественнай сэбиэт салайаааччыта Данилова Д.Д., “Знание” общество салайааччыта Яковлева В.Н., “Атамай сирдьитэ” хаһыат үлэһитэ Алексеева Т.В., “Таастаах нэһилиэгэ” МТ баһылыга Федотов Е.С. уонна дьаһалтатын үлэһиттэрэ кыттыыны ыллылар. Кэпсэтии сүнньүнэн инникитин төрүччүбүтүн чинчийэн, дириҥэтэн үөрэтии, ол боппуруоска генеалогия институтун кытта сибээстэһии, нэһилиэк гербэлэрин оҥостуу, национальнай архыыптан матырыйааллары булуу уо.д.а.тула барда.
Киэһэ өттүгэр икки нэһилиэк кыттыылаах улахан концерт буолла. Үөрүүлээх чааһыгар “Тастаах нэһилиэгэ” МТ баһылыга Федотов Е.С кэлэр сылга Таастаах нэһилиэгэ төрүттэммитэ 170 сыла, сөргүтүллүбүтэ 30 сыла бэлиэтэнэрин эттэ, Таастаах кырдьаҕас олохтооҕор Келин В.А. “Сэрии кэмин оҕото” диэн знагы туттарда. “Атамай нэһилиэгэ” МТ баһылыга Федоров Р.К. уонна “Тастаах нэһилиэгэ” МТ баһылыга Федотов Е.С. инникитин сибээстээхтик үлэлэһэргэ сөбүлэҥ түһэрстилэр. Кэнсиэркэ Болгарияҕа Приморсо куоракка аан дойдутааҕы Еврогрейд фестивальга 2 степеннээх лауреат аатын ылбыт Атамай нэһилиэгин “Долгууна” дьахталлар ансаамбыллара кыттыыны ылла. Эдэр сааһыгар ыарахан ыарыыттан күн сириттэн барбыт кылтан уонна сиэлтэн арааһы өрүүгэ талааннаах тарбахтаах эдэр маастар, «Түһүлгэ симэхтэрэ» түмсүү кыттыылааҕа Яков Ефремов кылынан өрбүт таҥастарын көрдөрдүлэр. Дьоро күммүт бырааһынньыктааҕы салютунан түмүктэннэ.
Комментарии
Авторизация на сайте через социальные сети