ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
9 октября 2015, 15:14

Тимирэн эрэр дьону быыһаабыт Ариан Габышев


Биһиги кэккэбитигэр хорсун санаалаах, наада тирээтэҕинэ тута көмөҕө кэлэр дьон аҕыйаҕа суох. Кинилэр биллэ-көстө сатаабакка, күннээҕи түбүктэринэн олороллор. Ол гынан баран, куттал суоһаатаҕына атыны санаабакка, тута көмөҕө кэлэр үтүө уратылаахтар. Маннык дьоруойдар баар буолан, олохпут кэрэ, үтүө. Биир оннук хорсун санаалаах киһинэн Ариан Габышев буолар.

Кини хорсун быһыытын туһунан кимиэхэ да кэпсии сылдьыбат. Киһини быһаабытын буолуохтааҕын курдук саныыр. Ол гынан баран, махталлаах ийэлэр аатын ааттыыллар, дьоруойдуу быһыыта бэлиэтэниэн баҕараллар.

Ол хайдах этэй?          Сайыҥҥы куйаас күн. Баскыһыанньа буолан, куорат дьоно сөбүлээн сынньанар Петуховка диэн сөрүүкүүр миэстэлэригэр киһи элбэх. Ол күн Ариан табаарыстарын кытта пляжка сынньана киирбитэ.

  Бу бириэмэҕэ  алта саастаах оҕо сөтүөлүү сылдьыбыта. Оҕо ууга киирэн, харбыырга үөрэнэр, оонньоон уунан чаламааттанар. Биэрэккэ ийэтэ баар, оҕотун көрөр-истэр. Барыта үүт-тураан курдуга. Эмискэ дохсун сүүрүүк кэлбит даҕаны оҕону эрийэн үөс диэки илдьэ турбут. Оҕо туох баар күүһүнэн харбыы сатаан муҥнаммыт да, сотору күүһэ эстибит. Сатаан хаһыытыыр да кыаҕа суох буолбут. Ийэ эрэйдээх сүрэҕэ айаҕар тахсан, оҕотун диэки ойбут да, биирдэ күүһэ өһүллэн, атаҕа баата курдук буолан накыс гыммыт, онон барар-кэлэр кыаҕа суох буолан аймана тураахтаабыт.   Бу түгэҥҥэ аҕыйах сөкүүндэ да күндү. Ариан балаһыанньаны тута сыаналаат, ууга сүүрэн киирбит да харса суох оҕо диэки харбаабыт, күүһэ бүтэн тимирэн эрэ оҕону көтөҕөөт биэрэккэ дьулуспут. Биэрэккэ таһааран баран, оҕоҕо бастакы көмөнү оҥорбут. Сотору кэминэн оҕолоох ийэ бэттэх кэлбиттэр. Арай аттыларыгар Ариан курдук хорсун санаалаах киһи суох буоллун... Маннык санаа ийэҕэ киирдэҕинэ дууһата биирдэ аймалҕынан туолар. Кинилэр дьоллоругар Ариан Габышев чугастарыгар баар буолан алдьархайы туораппыта.

  Манна бэлиэтээн эттэххэ, Ариан бу иннинэ төрөөбүт Уус-Алданыгар эмиэ ууга тимирэн эрэр киһини быыһаан турар.

  Ариан Габышев курдук хорсун дьон баарын тухары олох быстыбат, салҕанар. Оттон дьон-норуот бэйэлэрин дьоруойдарын билиэхтээх дии саныыбыт.

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 755 Источник: ЯСИА Автор: Надежда Егорова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ