Бастаан улуустааҕы киин балыыһаҕа нэһилиэктэр сиэстэрэлэрэ, үлэһиттэрэ кыттыылаах «Аҕыйах ахсааннаах уонна киинтэн тэйиччи олорор тыа олохтоохторугар медицинскэй көмө» тиэмэҕэ киэҥ кэпсэтии, кыһалҕалары быһаарсыы, уопут атастаһыы буолла. Онтон Саскачеван университетын преподавателигэр уонна студеннарыгар Граф Биэрэгинээҕи ФАП-ка өр кэмҥэ үлэлээбит уопуттаах акушер Игнатьева Азалия Егоровна үлэтин билиһиннэрдилэр. Онно тиийбиппитигэр үс эдэр ийэ оҕолорун көрдөрө сылдьара. Онон ыалдьыттарбыт тыа сирин акушерын үлэтин тус бэйэлэринэн көрдүлэр-иһиттилэр. Ол кэнниттэн биир идэлээхтэр санааларын үллэһиннилэр. Кинилэргэ ыраах сытар хотугу нэһилиэктэрэ айылҕатынан биһиэнигэр майгынныырын бэлиэтээтилэр. Балыгынан, булдунан дьарыктаналлар, кыһынын тымныы эбит. Онон ордук үлүйүүнү, ыт ытырыытын хайдах эмтиири интэриэһиргээн ыйыттылар. Ол кэннэ Граф Биэрэгэр олорор дьиэ кэргэҥҥэ ыалдьыттаатылар. Хаһаайын оҕуруотун, ньирэйдэрин, хаһаайыстыбатын көрдөрдө, күннээҕи дьарыгын кэпсээтэ.
Николай Дьячковскай: «2010 с. бу икки университет хардарыта үлэлэһэргэ сөбүлэһии түһэрсибиттэрэ. Онон, Доруобуйа харыстабылын министерствотын кытта сүбэлэһэн баран, республика үрдүнэн Нам улууһун балыыһата тэрээһин өттүнэн, кадровай боппуруоска хабааннаах үлэни үчүгэйдик ыытарынан уонна тыа балыыһаларыттан билиҥҥи таһымҥа эппиэттиир биир бастыҥ үлэлээҕинэн сыаналаан тас дойду студеннарын аҕалан быраактыка ыыттарыахпытын сөп эбит диэн санааҕа кэлбиппит. Онон Саскачеван университетын студеннара манна быраактыкаларын бара сылдьаллар».
Буллин Кэрол Энн: «Тыа сиригэр медицина хайысхата хайдах үлэлиирин билсэ сылдьабыт. Саха сиригэр кэлэн элбэх билиини ыллыбыт. Сүнньүнэн биһиги регионнарбыт, айалҕа, сир-уот да, медицина да өттүнэн майгыннаһар эбиттэр. Инникитин маннык үлэни быспакка куруук бииргэ үлэлииргэ сыал-сорук туруорунабыт. Канадаҕа Интернет нөҥүө үөрэнэн идэ баһылыыллар. Бу Саха сиригэр эмиэ киириэҕин баҕарабыт».
Леонид Слепцов, Нам улууһун кылаабынай бырааһа: «Канада студеннара кэлэн биһиги материальнай базабытын, кадрдарбытын, үлэлиир усулуобуйабытын көрө-истэ сылдьаллар. Бу курдук хардарыта үлэни ситимин быспакка, биһиги специалистарбытын эмиэ тас дойдуга ыытан идэлэрин таһымын үрдэтиигэ үлэ барыан баҕарабыт. Маннык бырайыакка кыттыбыппытыттан олуһун үөрэбит».
Комментарии
Авторизация на сайте через социальные сети