Ыҥырыылаах ыалдьыттарынан Дьокуускай куорат Думатын депутата, Ыччат парламенын спикерэ Руслан Михайлов, СӨ Уопсастыбаннай кэтээн көрөр хамыыһыйатын чилиэнэ Алексей Андреев, Ил Түмэн депутата Василий Местников көмөлөһөөччүтэ Семен Григорьев сырыттылар, буруйдарын боруостаан олорооччуларга ыһыаҕынан эҕэрдэлээн туран, баҕа санааларын тиэртилэр.
Онтон саха сөбүлүүр артыыстара Александр Бурнашев, Сахаайа, Геннадий Семенов, эдэр ырыаһыттар Эрхаан, Анатолий Горохов, Айхаана бэртээхэй кэнсиэр көрдөрдүлэр. Александр Бурнашев пародиялара, Сахаайа Улуу Кыайыы 70 сылыгар анаммыт ырыата уонна Геннадий Семенов “Урааҥхайдар” ырыата дохсун ытыс тыаһынан доҕуһуолланнылар. Табаҕа хаайыытын толору туолбут кулуубугар кини ырыатыгар “айхал, айхал, айхал!” диэн уруйдуур хаһыы сатараата.
Кэнсиэр кэнниттэн өрө көтөҕүллүбүт дьон сууланан тахсан алгысчыт Арыйаан аал уоту оттон, уокка алаадьынан айах тутан, алгыырын, ыраастаныы сиэри-туому толорорун чуумпуран туран көрдүлэр-иһиттилэр.
РФ Накаастабылы толорор федеральнай сулууспатын Саха сиринээҕи управлениетын Уопсастыбаннай сэбиэтэ тэрийбит ыһыаҕар салгыы мас тардыһыытыгар уонна хапсаҕайга күрэхтэһии буолла. Күрэхтэһиигэ биллиилээх тренер Николай Константинов, спортсмен Юрий Протопопов судьуйалаатылар.
Кыттыбыт ыалдьыттары олохтоохтор илии тутуурдаах, өттүк харалаах таһаардылар.
Комментарии
Авторизация на сайте через социальные сети