Кэлиҥҥи кэмҥэ Өймөкөөн улууһун Ньукулай Кырбаһааҥкын аатынан Өймөкөөн орто оскуолатын алын сүһүөх кылаас учуутала, ырыа куттаах, улуус олохтоохторо "Өймөкөөн күөрэгэйэ" диэн таптаан ааттыыр ырыаһыппыт Агафья Готовцева уоппускатын ырыа куонкурустарыгар кыттарга аныыр буолла. Ол курдук, кини дьүөгэтинээн, эмиэ учуутал Ирина Сивцевалыын "Иэйии" дуэттара быйыл оҕо сааскы каникулугар Арабскай Эмиракка ыытыллыбыт аан дойдутааҕы этническэй ырыа куонкуруһугар кыттан, 2-с степеннээх лауреат аатын ылбыттара. Онно Агафья "Төрүт" вальса солотынан 1-кы степеннээх лауреат аатын ылбыта.
Быйылгы сайыҥҥы уоппускаларын Өймөкөөн учууталлара аны Керчь куоракка ыытыллыбыт "Үс муора фестивала", Крымҥа ыытыллыбыт "Богатство России", "Сердце Крыма", 15-с төгүлүн ыытыллар "Единство России" - барыта түөрт ырыа куонкурустарыгар кыттан, үһүгэр Гран при номинацияҕа кыайдылар. Агафья кыыһа Агата Готовцева хомуска оонньоон, "Сердце Крыма" куонкуруска Гран при номинация хаһаайкатынан буолла. Оскуола үлэһиттэриттэн таҥыллыбыт Агафья Готовцева, Ирина Сивцева, Светлана Готовцева "Далбар" ансамбллара норуоттар икки ардыларынааҕы "Единство России" куонкуруска 1-кы степеннээх лауреаттарынан буоллулар.
Саха сириттэн ырыа фестивалларыгар 64 ырыа куттаах дьон кытыннылар. Кинилэри култуура туйгуна, продюсер Екатерина Ощепкова салайан илдьэ сырытта.
Комментарии
Авторизация на сайте через социальные сети