Кинигэ Дьокуускай куоракка 250 ахсаанынан „Якутия” медиа-холдиҥҥа бэчээттэннэ. Редакторынан Екатерина Захарова үлэлээтэ. Кинигэ күн сирин көрөрүгэр улуус дьаһалтата үбүнэн көмөлөстө.
Кинигэ аан тылыгар Александра Николаевна: “Билиҥҥи эдэр ыччат аҕа саастаах көлүөнэ дьон сэрии ыар кэмигэр аччыктааһыны, тоҥууну-хатыыны, өлүүнү-сүтүүнү аахсыбакка туран Улуу Кыайыыны уһансыбыттарын, кыра оҕолор эт-тирии баранар үлэлэригэр улахан дьону кытта тэҥҥэ үлэлээбиттэрин, тыыннаах хаалбыттарын биллиннэр, олохторугар холобур оҥоһуннуннар диэн бу ахтыы кинигэни таһааран эрэбит”, — диэн суруйбут.
Кырдьык, сыллата ытык кырдьаҕастарбыт, оччотооҕу ыар кэми эттэринэн-хааннарынан билбит эбэлэрбит, эһэлэрбит күн сириттэн туораан, ахсааннара аҕыйаан иһэр. Инникини өтө көрөн, билигин биһиги кэккэбитигэр суох үгүс дьонтон тыыннаахтарына ахтыыларын ылан кинигэҕэ киллэрбиттэрэ ыччаттарыгар күндү бэлэх буолар аналлаах. Кинигэҕэ сэрии сылларыгар тэриллибит оройуон хаһыатын матырыйааллара “Саһарбыт страницалар кэпсииллэр” диэн ааттанан, кинигэҕэ туспа бас буолан киллэриллибиттэр.
Итини сэргэ Орто Халыматтан барбыт сэрии кыттыылаахтарын, өр кэмҥэ оройуоҥҥа олохсуйан үлэлээбит, олорон ааспыт сэрии кыттыылаахтарын, милитаристскай Японияны утары сэриилэспиттэр, Үлэ фронун кыттыылаахтарын ааттара-суоллара суруллубут. Салгыы „1941-1945 сылларга Аҕа дойдуну көмүскүүр Улуу сэрии кэмигэр үлэҕэ килбиэнин иһин” мэтээлинэн наҕараадаламмыттар толору ыйыллыбыттар.
Ити курдук аан дойду историятыгар үгүс хаан тохтуулаах сэрии ыраах уһук хоту, Халыма эбэ кытылыгар олохсуйан олорор дьоҥҥо сабыдыала, кини ыар тыына хайдах охсуллан ааспытын бу кинигэттэн толору билэр кыахтанныбыт.
Комментарии
Авторизация на сайте через социальные сети