Иккис күннээх үбүлүөй тэрээһинэ олус кэрэхсэбиллээхтик, сэргэхтик ыытыллыбыта киһини эрэ үөрдэр. Ол курдук, бастакы күн билигин үөрэнэ сылдьар оҕолорго, төрөппүттэргэ үлэһиттэргэ анаан “Туругур, сайда тур оскуолам!”диэн үөрүүлээх линейкаҕа нэһилиэк, оскуола наҕараадалара туттарылыннылар. Үбүлүөйгэ анаан оҥоһуллубут икки миэтэрэлээх, 100 чүмэчилээх сүүнэ улахан торт оҕо-аймах үөрүүтүн үрдэттэ. Оскуола музейыгар “Оскуола биһиги биһикпит” быыстапка аһыллыыта буолла.
Үбүлүөйгэ анаан “Оскуолабыт – билии-көрүү аартыга” диэн олус киэҥ ис хоһоонноох, тупсаҕай оҥоһуулаах бэртээхэй кинигэ тахсыбытыттан астынныбыт. Бу улахан суолталаах кинигэни сыралаһан хомуйсан таһаарсыбыт оскуола библиотекарыгар, үөрэнээччибитигэр Лукина Наталья Дмитриевнаҕа махталбыт муҥура суох.
Үөрэнээччилэри уонна эдэр учууталлары кытары көрсүһүүлэр алын сүһүөх кылаас учуутала Вера Викторовна Никонова салалтатынан сэргэхтик, сонуннук тэриллэн, кэлбит ыалдьыттар көхтөөхтүк кытыннылар. Эдэр көлүөнэ учууталлар саҥа сүүрээни киллэрэн, утум салҕанан иһэриттэн сүргэбит көтөҕүлүннэ. Салгыы капитальнай өрөмүөн кэнниттэн аһыллыбыт нэһилиэк спорт саалатыгар “Оҕо саас оонньуулара” диэн көлүөнэлэр икки ардыларыгар күрэхтэһии өрө күүрүүлээхтик ыытыллан үгүс киһини түмтэ.
Иккис күн “Төрөөбүт күҥҥүнэн, оскуолам!” тэрээһиҥҥэ оскуоланы араас сылларга бүтэрбит үөрэнээччилэр истиҥ эҕэрдэлэрэ барыбытын долгутта. Учууталга саамай үрдүкү сыанабылынан үөрэнээччи ис сүрэҕиттэн махтала буоларын өссө төгүл итэҕэйдибит.
“Тапталлаах оскуолам 100 сааһа” үөрүүлээх тэрээһин толору киһилээх кулуупка бэрт сэргэхтик барда. Улууска Герой пионер Сима Сергеев аатынан соҕотох пионерскай дружина эҕэрдэтинэн саҕаланан баран, улуустааҕы хомуньуустар үтүө баҕа санааларынан, дэҥҥэ көстөр барабаан, горн бэлэхтэринэн түмүктэннэ.
Кэлбит ыалдьыттар ортолоругар Уорҕа оскуолатыгар өрдөөҕүтэ үөрэммит ытык кырдьаҕастар - тыыл, үлэ бэтэрээнэ, “Гражданскай килбиэн” бэлиэ хаһаайына Федотов Иван Иванович, үлэ, тыыл уонна спорт бэтэрээнэ, ССРС физическэй иитиигэ туйгуна, Хамаҕатта нэһилиэгин (Нам) бочуоттаах гражданина Егор Михайлович Феофанов, Уорҕа алын сүһүөх оскуолатын ветеран учуутала Дария Сергеевна Никонова уонна СР үтүөлээх учуутала, РФ үөрэҕин туйгуна, Чурапчы улууһун бочуоттаах олохтооҕо Виталий Михайлович Неустроев, Аҕа дойду сэриитин бэтэрээнэ Флегонтов Семен Дмитриевичтөрөппүт кыыһа Наталья Семеновна Флегонтова, Сима Сергеев бииргэ төрөөбүт балта Нина Николаевна Сергеева бааллара бырааһынньыгы киэргэттэ.
Үтүө өйдөбүлү хаалларбыт, эдэр сааспытын санаппыт бэлиэ тэрээһин иһин нэһилиэк баһылыгар Степанов Афанасий Афанасьевичка, оскуола кэлэктиибигэр (директор Лукин Александр Петрович), выпускниктарга барҕа махтал тылы этэбит. Айымньылаах үлэни, ситиһиилэри, чэгиэн-чэбдик олоҕу баҕарабыт. Ыра санааҕыт олоххо киирдин диэн алгыыбыт.
Дьокуускай куораттан бэтэрээн учууталлар Уарова Евдокия Саввична, Елисеева Мария Иннокентьевна, Алексеева Татьяна Ильинична.
Комментарии
Авторизация на сайте через социальные сети