- Светлана Петровна, хаһааҥҥыттан саҕалаан иистэнэр-тигэр буолбуккунуй?
- Оҕо сааспыттан саҕалаабытым, бастаан быысабайдыыр буолбутум. Итинтэн салгыы оҕуруоҕа талаһан барбытым. Биир сыбаайбаҕа сабыс-саҥа ырбаахы тиктэн оҕуруолаан кэппитим. Кэргэним ханыым олоҕум аргыһа сылдьар эбит диэн итиннэ сөбүлүү көрбүт этэ. Ити 1969 сыллаахха ыал буолан холбоспуппут, ол онтон ылата оҕо төрөтөн, сиэн оҕо минньигэс сытын билэн үчүгэй баҕайытык олордохпутуна, кэргэним эмискэ ыалдьан бу олохтон барбыта. Ити олус хомолтолоох да хайыамый?... Күндү кэргэним туох баар үлэлэрбин,бастаан көрөр сыаналыыр этэ. Кини кэриэһин толорон айабын-тутабын, иистэнэбин. Президент В.В.Путин гранын хаһаайката, Россия худуоһунньуктарын сойууһун чилиэнэ, биллиилээх учуутал Галина Дмитриевна Семенова көҕүлээн норуот маастара буолар сыаллаах үлэлии-хамсыы сылдьабын. Оттон ситиһиим диэн «Арктика сылыгар» аналлаах «Бисер Севера» диэн конкуруска кыттан дипломант буолан тахсыбытым, - диир Светлана Петровна.
Кэргэнэ Валентин Васильевич Павлов II Малдьаҕар орто оскуолатыгар 41 сыл физкултуура, военрук уонна история учууталынан үлэлээбит. Саха өрөспүүбүлүкэтин үөрэҕириитин туйгуна, Бырабыыталыстыбаттан, Саха өрөспүүбүлүкэтин социальнай-экэнэмиичэскэй сайдыытыгар үтүөлэрин иһин бэлиэнэн наҕараадаламмыт. Үөрэҕирии ситимин бочуоттаах бэтэрээнэ этэ. Бу нэһилиэк олохтоохторун 80% үөрэппит үтүө киһи.
Светлана Петровна, кэлин кылынан-сиэлинэн оҥорууга санаата тохтоон, дэйбиирдэри оҥорор. Итинник санаатын сайыннаран, инникитин да былаана үгүс эбит. Персональнай быыстапка, маастар-кылаас ыытарга бэлэмнэнэр, айылҕаттан талааннаах киһи дьиҥ норуот маастара.
Ааптар хаартыскаҕа түһэриитэ.
Комментарии
Авторизация на сайте через социальные сети