Ол курдук, Дьокуускай куорат 10, 16, 24 уонна 30 №№-дээх оскуолаларын үрдүкү кылааһын үөрэнээччилэрэ конвоирование отделыгар уонна спецназ этэрээтигэр ыалдьыттаатылар. Ханнык үөрэх тэрилтэлэригэр холуобунай-исполнительнай систиэмэ үлэһиттэрин бэлэмниир туһунан НТФС ССУ кадрга отделын идэҕэ бэлэмнээһин бөлөҕүн инспектора, ис слууспа капитана Алексей Никулин кэпсээтэ. Уонна ол үөрэх тэрилтэлэрин туһунан документальнай киинэни көрдөрдө, оҕолор интэриэһиргиир ыйытыыларыгар хоруйдаата.
Ити кэнниттэн конвоирование отделын начальнигын иитэр үлэҕэ солбуйааччы, ис сулууспа майора Сергей Лобода гарааска хаайыылаахтары таһарга аналлаах “вездеход”-массыыналары көрдөрдө, ис оҥоһуутун, тугун-ханныгын кэпсээтэ. Оҕолор иһирдьэ киирэн көрдүлэр-иһиттилэр, эрэһээҥкилээх массыынаттан тахсалларыгар, дьээбэлэнэн: “Свобода-а!”, -- дии-дии, хаһыытастылар.
Саамай сэргээбит уонна харахтара уоттаммыт түгэннэринэн конвоирдарга “бөрөстүүпүнньүктэр” саба түһэн тутуллуулара уонна спецназ байыастара араас сэби-сэбиргэли көрдөрө-көрдөрө кэпсээһиннэрэ буолла. Бу кэнниттэн оҕолор конвоирдар үөрэнэр сөмөлүөттэригэр уонна Накаастабылы толорор управление музейыгар сырыттылар.
Бу тэрээһин түмүгэр, үс уол холуобунай-исполнительнай систиэмэҕэ үлэлиир баҕалааҕын, эһиил бу хайысханан үөрэх туттарса барыаҕын биллэрдэ.
Манна даҕатан эттэххэ, Россия НТФС-н Рязаннааҕы Быраап уонна управление академиятыгар, Владимирскайдааҕы юридическай институкка, Вологодскайдааҕы Быраап уонна экономика институтугар, Воронежтааҕы, Кузбасстааҕы уонна Пермнээҕи институттарга араас специальностарга босхо үөрэтэллэр. Үөрэххэ киирбит студеҥҥа ый аайы 15 тыһ.солк. төлөнөр, анал звание иҥэриллэр, форма бэриллэр, ону таһынан, уопсай дьиэҕэ олоруу уонна аһылыга эмиэ босхо буолар. Үөрэнэр кэмҥэ армияҕа ыҥырыллыы көһөрүллэн биэрэр. Үөрэнэр кэм сулууспа ыстааһыгар ааҕыллар уонна үөрэҕин бүтэрбит киһи үлэнэн тута хааччыллар.
Маныаха доруобуйа туруга, БКЭ ситиһиилээхтик туттарыы, эт-хаан өттүнэн лаппа кыанар буолуу (100, 1000, 3000 м сүүрүү, тардыныы, сиртэн анньыныы) ирдэнэллэр. Интэриэһиргээбит дьон үөрэххэ туттарсыы туһунан Дьокуускай куорат, Накаастабылы толорор управление дьиэтигэр, Дзержинскэй уул, 10 №-ригэр, каадыр отделыттан сиһилии билиэхтэрин сөп.
Комментарии
Авторизация на сайте через социальные сети