Ветеран-библиотекарь Акулина Дмитриевна Пестрякова быданнааҕыта маҕаһыынтан сиэри атыыласпыт лимоннаах мандаринын сиэмэлэрин боруобаҕа диэн олордубут. Бу туһунан биһиэхэ улуустааҕы киин библиотека директора Варвара Николаевна Окоемова кэпсиир:
- Мандарины 20-тэн тахса сыллааҕыта, лимону 17-18 сыллааҕыта олордубут. Сылаас дойду үүнээйилэрэ биһиги тымныы кыһыннаах Сахабыт сирин атыҥыраабатахтар, уһулуччу ньээҥкэлээһини да эрэйбэтэхтэр. Библиотекарь, СР культуратын туйгуна Марфа Анатольевна Пестрякова кэпсииринэн, мандариннаах лимоннара төһө улаатарынан көрөн, иһиттэрин хаста да уларыппыттар. Онуоха көрүүтэ-харайыыта судургута сөбүлэппит. Кэмиттэн кэмигэр быыллыылларын, күһүнүн хойуутук түһэр сэбирдэхтэрин хомуйан буорун ыраастыылларын, сиигин көтүппэккэ уу куталларын бэлиэтиир. Аналлаах буору атыылаһан эбэн биэрбиттэригэр үүнээйилэрэ быйыл биллэ чэчирээн, чэлгийэн үөрдүбүттэр. Онон уус-күөллэр библиотекаларыгар мандарин уонна лимон сыта дыргыйан олорор.
Билэргит курдук, бу үүнээйилэр киһи доруобуйатыгар туһалара элбэх. Сыттара өйгө-санааҕа дьайар уратылаах. Холобур, лимон сыта киһи үтүө санааланарыгар, ыллам-дьэллэм буоларыгар көмөлөһөр. Оттон мандарин сыта толкуйдуур дьоҕуру күүһүрдэр диэн бэлиэтииллэр.
Комментарии
Авторизация на сайте через социальные сети